全球喺新型肺炎疫情下，新年慶祝活動唔係取消就係大幅縮小。俄羅斯都唔例外。首都莫斯科紅場煙花依舊，但電視畫面入面，廣場上一個人都無，因為要宵禁。

不過各國領袖發表新年賀詞嘅傳統就無變，內容除咗祝福國民以外，今年當然要喺疫情下提振人民士氣啦。俄羅斯總統普京都唔例外。

俄羅斯塔斯社嘅報道話，「喺遠東堪察加半島嘅人民喺凌晨零時前收聽到賀詞」。但係俄羅斯幅員廣大，有十一個時區。要喺每個地區當地時間凌晨零時前播出節目，即係話要播十一次！好彩依家係有錄影，如果要現場，普京就要講十一次相同嘅內容，一個鐘講一次，仲要由下午三點前講到凌晨一點（加里寧格勒比莫斯科慢一個鐘），就算係好似普京咁硬朗，都咪話唔辛苦！

最後教一家一句俄文，新年快樂喺俄文叫С Новым Годом（讀音係s nò-vym gò-dam）。假期結束，今日大家都要加油啦！