全球航空業喺新型肺炎疫情大受打擊。不過航空業界亦努力自救，除咗改裝客機承擔貨運服務，仲推出各種活動，喺安全嘅前提下吸引乘客，增加收入。
泰國國際航空最近將喺曼谷總部嘅員工飯堂改裝成機艙主題餐廳對外開放。為求迫真，「乘客」要預先訂枱，「上機」前要出示「登機證」。「上機」使用嘅是真實使用嘅舷梯，並由身穿制服、佩戴面罩嘅空中服務員接待。座位也是與飛機客艙內使用嘅座位，而且亦分為經濟艙同商務艙，其他裝置也利用咗真實嘅飛機零件。
至於食物就係即叫即整，單點95泰銖（折合24澳門元）起，每日可賣出2000份。平日製作幾千份飛機餐嘅廚師說，第一次同「乘客」互動，感覺好特別。餐廳內亦有紀念品售賣，仲有登機門供大家影相留念。平時大家忙著上落機，如今可以「任影唔嬲」啦！
喺臺灣，當地有旅遊電商、臺灣虎航以及韓國觀光公社臺灣分社，聯合推出專為疫情下希望坐機旅行遊客設計嘅「韓國想見你、台虎想念號起飛」濟州微旅行商品，9月14日推出，四分鐘就賣曬啦！
120名遊客將喺9月19日（今日）從臺北桃園機場飛去濟州，飛機喺濟州唔會著陸只會喺上空盤旋，等乘客欣賞景色，然後就返臺灣。上機前遊客可穿韓著同飛機合照，喺機上品嚐韓式炸雞啤酒，體驗各種韓國傳統遊戲，並將獲贈疫情後一年有效嘅臺北至濟州來回機票。
至於由於疫情，跨州旅行受限制嘅澳洲，亦都推出咗「空中漫遊」嘅國內航線，讓乘客無需隔離都可以飽覽澳洲嘅山河景色。
10月10日，澳洲航空一架波音747航機將接載150名乘客，喺雪梨機場起飛，飛越新南威爾士州、昆士蘭州同北領地嘅上空，期間會低飛澳洲部分地標，包括烏魯魯石（Uluru）、被譽為風之谷的卡塔丘塔（Kata Tjuta）、聖靈群島（Whitsundays）、黃金海岸、拜倫灣（Byron Bay）、雪梨港等。
歷時七小時嘅航程有餐飲服務，雖然機票並唔平（經濟艙787澳洲元，折合4596澳門元），但10分鐘內仍然搶購一空。
（SBS / 路透 / 韓聯社）
濠遊天下 Macau on Journey, 