喺呢個「我自拍我存在」嘅年代，地方要吸引遊客，顏色嘅運用係好常用嘅方法。

喺南韓西南部、全羅南道新安郡嘅半月島同朴只島，有「紫色群島」之稱。當地人受象徵大韓民族嘅桔梗花啟發，將島上嘅房屋、道路、橋樑，都髹上紫色，種植薰衣草、紫菀等紫色花卉，吸引遊客。

唔單只係咁，島上嘅人都係穿着紫色嘅衣服，餐廳都係用紫色嘅食具盛載食物，就連米飯都係紫色嘅！

當地同南韓好多農村地區一樣，都面臨年輕人口流失嘅問題，兩個島上大約100名居民大部份都已經上咗年紀，過住與世隔絕嘅生活。

當地政府自2015年起，投資咗48億韓圜將成個島變成紫色，包括將面積超過28,000平方米嘅屋頂髹上紫色。2019年呢個旅遊開發計劃就吸引咗超過487,000名遊客到訪。

島上有老人家表示，高興有年輕人同小朋友到島上觀光：「佢哋好似我哋嘅孫咁樣。」「每日由頭到腳都係紫色，令我感到好開心。」

遊客可以喺連接兩島嘅三座紫色行人橋上漫步，坐喺寫有「紫愛你」（보라해）標語嘅長凳上休息。而呢句說話被當地男子組合防彈少年團成員金泰亨賦予「信任、長久嘅愛」嘅意思。

如果係穿紫色衣服，仲可以豁免登島費。

有南韓遊客表示，受到疫情影響無法出國旅行，於是就嚟到呢度：「見到啲婆婆身穿紫色衣服，感覺好夢幻。」

（路透社）