舊年可以話係澳門「心出發」之年，九澳聖母村作為澳門一處秘境，成為好多人嘅「打卡」熱點。今個春天，濠記再次來到九澳聖母村，看看村內嘅變化。

村內其中兩幢房屋，昔日係痳瘋院友居住嘅地方，如今被改建成咖啡室同埋藝術展覽場地。而且場地都係由喺澳門戒毒康復協會（ARTM）接受戒毒治療嘅朋友負責營運。

藝術畫廊正在舉辦慈善義賣攝影展，係由36位作者、180多件作品中挑選出18位參展攝影師、共45件作品。作品都係以聖母村為題材，有啲作品仲係修復前嘅面貌，相信已經唔會再見到啦。

負責解說嘅朋友原來係協會嘅院友，佢十分健談，除咗介紹治療嘅情況，亦都好樂意分享自己嘅心路歷程。佢依家正在學習策展嘅技巧，將來有機會可以去相關機構工作。更值得高興嘅係，展覽第一日已經有超過一半作品「名花有主」。想要用實際行動支持戒毒康復事業，或者親身為院友打氣，就要把握機會啦！

咖啡室售賣各種飲品同葡式小食，例如係馬介休球、豬扒包、椰撻等，仲有少量葡式商品同埋紀念杯。坐喺露台，曬著西下斜陽，嘆返杯咖啡，再回想欣賞過嘅作品，會唔會有更深嘅感受呢？

不過，其餘房屋嘅用途暫時未有公佈，希望政府、教會都可以重視呢方面嘅工作，將部份房屋改成聖母村歷史展示同教育場所，令到更多人認識到當中嘅歷史，讓大家睇到希望嘅傳承。

延伸行程：

鍾意飛行嘅朋友亦可以沿村後嘅小路，步行前往九澳燈塔，觀賞飛機從澳門機場升降嘅情境。燈塔另一面就係澳門秘境之一嘅「蝙蝠洞」，更適合愛刺激冒險嘅朋友，不過要去嗰度就要做足準備、注意安全呀！

「浮光．希望」——澳門九澳戒毒康復協會慈善義賣攝影展
地點：九澳聖母村黃屋仔ARTM H2H畫廊
展期至2021/4/24

Hold On To Hope Café
營業時間：星期一、星期二、星期五上午10時30分至下午5時
星期六、星期日及公眾假期上午10時30分至下午6時半

• 

• 

• 

• 

• 

• 

• 

• 

•