清明復活節長假期將至，大家可能會考慮去廣東玩個三四日。依家有個好消息！

中旅巴士日前宣佈，自3月27日（本周六）起，恢復澳門（珠海）至肇慶／三水／四會嘅班車。

澳門（珠海拱北汽車站）至肇慶每日兩班，分別早上10：30同晚上7：05開車，在肇慶分別停星湖大酒店及國際大酒店。肇慶返拱北汽車站亦都係每日兩班，國際大酒店開車時間係早上7點同下午2：40，而星湖大酒店開車時間係早上7：15同下午3：00。肇慶出發單程票最低60元人民幣，澳門出發單程100元。

澳門（珠海拱北汽車站）至三水／四會每日兩班，分別早上11：25同晚上7：15開車。第一班車停靠三水中旅同四會汽車站，第二班車停靠三水中旅同三水廣場前途酒店。三水／四會返拱北汽車站亦都係每日兩班，第一班車由三水中旅出發，開車時間係早上6：50（7：00停靠獅皇麗星華廷酒店，7：10停靠三水廣場前途酒店），而第二班車由四會汽車站出發，開車時間係下午3：00（3：50停三水中旅）。肇慶出發單程票最低60元人民幣，澳門出發單程95元。

肇慶歷史悠久，有超過一千四百年歷史，尤其是鼎湖山，保護區森林面積高達78.8%，空氣相當清新。趁住春天，萬物生長，去「大灣區後花園」嚟一個洗肺之旅，都係唔錯嘅選擇。