自從文華書店喺拱北原國際大廈嘅門市結束，澳門愛書之人少咗一個睇書、買書嘅好去處。

不過，喺呢個書卷漂香嘅四月，珠海終於再有新嘅大型書店啦！

今次新開嘅書店位於深受年輕人喜愛嘅富華里。不過，書店門口一個大大個「覔」字，可能會難倒好多人，包括濠記。

「不」「見」？唔見人？唔見書？

原來呢個字係「覓」嘅通假字。不見所以就要尋覓，呢個正好符合讀書背後求知明理嘅精神。書店設計者更指出呢個名字「契合當下書店文化氣質，也表達當下消費人群獨特的態度和自由精神」。書店之前已經深圳、東莞、河源等地開設分店，壹方城店、國貿店更先後獲得「全國最美書店」、台灣「金點設計獎」等獎項同稱號。

如今，覔書店終於跨越珠江，在西岸落腳，與包括澳門嘅珠江西岸嘅讀者朋友見面啦！

一入書店，第一個感覺就係，同平常書店一樣，接待櫃台、書架，一間書店應該有嘅通通都有。作為一個「新型文化概念體驗書店」品牌，亦都有飲咖啡嘅空間，有展覽、售賣文化產品嘅空間，亦都有舉行活動嘅空間。不少讀者喺無活動嘅平日下午，喺半圓劇場般嘅空間中坐喺蒲團上睇書。

不過，去到小朋友嘅世界，濠記突然悟出咗書店嘅主題：整座書店就好似一隻船。我哋因為「不見」去書店尋「覔」，而入面嘅細節，例如造型有如昔日木船龍架般嘅書架，繪本部嘅「船頭」設計，處處蘊含「海洋」嘅元素，讓我哋重拾喺「書海」中嘅感覺，而且呢一種習慣係要由細去培養嘅。

覔書店

地址：珠海富華里一、二楝地下一層01A

營業時間：上午10時30分至下午10時30分

• 

• 

• 

• 

• 

• 

• 

• 

• 

•