雖然話「病毒不分國界」，連英國王儲、首相都會感染到新型肺炎，但疾病在一個國家內，以及在國際層面，最容易受打擊的往往是貧困嘅、非歐裔嘅一群。

例如喺今次疫情最重災嘅美國，位於大湖區嘅密歇根州，非裔人口佔14%，但新型肺炎的死者中，有40%是非裔人。芝加哥所在嘅伊利諾伊州也有同樣嘅情況。

而喺印度，近年來經濟發展迅速，但同時貧困問題仍然十分普遍。印度早前宣佈封城，大批人無法維持生計，被迫回鄉，無車嘅貧苦大眾喺公共交通停運下，只能徒步返去。但有人最後連屋企都返唔到，死喺路上。就算好彩返到去，都可能帶埋病毒一齊返去，加上檢測能力低下，疫情擴將會更嚴重。

即使喺城市亦都唔好過。喺印度有好多貧民窟，居住環境極為擠迫，衛生條件不佳，而且欠缺基層治理，點樣做到政府呼籲嘅「保持社交距離」呢？孟買最大嘅達拉維（Dharavi，也作「塔拉維」）貧民窟4月1日就出現第一宗新冠肺炎患者。當地人口密度係每平方公里27萬人，係澳門係十幾倍！印度嘅病例係以每四日一倍嘅速度增加，所以成為下一波震央並不出奇！

我哋再透過醫療資源嘅分配，嚟了解國際上嘅資源分配不均。

喺臺灣每10萬人有61部呼吸機，德國24部、英國12部、義大利5部。喺南蘇丹，1100萬人只有四部呼吸機。而喺西非塞拉利昂，750萬人口就只有……1部。至於深切治療床位，索馬里1500萬人有15張，馬拉維1700萬人有25張，烏干達4300萬人有55張。

世衛非洲區主管話，近期嘅封城、供應短缺等情況將令物資更難到達。非洲疾控中心聯會主任就指：「保障自己國民是需要，但呢一場係一場全球挑戰，需要國際間團結起來。」國際救援委員會會長指出，咁樣係無法應付大量病人。呢啲國家有幾個星期去做預防工作，但全球籌募所需資金嘅呼籲仍然未獲回應。對於一個長年為暴力、疾病疲於奔命嘅大陸，能夠應付新一波疫症嗎？

當然，要討論第三世界嘅危機，可以係一份博士論文嘅題目。不過希望大家唔好忘記世界上仍然有無數人可能連知道自己有冇病、連救治嘅機會都無！問題係如果世上只要有人受到感染，呢個就係全人類嘅苦難！無一個人會安全！