平時去旅行，一般都係期望去一個地方食、玩、買，仲要幫人修葺地方？

其實出外旅行，我哋係喺度消費其他地方、其他人嘅資源、文化等。我哋又係唔係可以為目的地做多一啲事？近年喺唔少地方都開始流行「義工旅遊」，甚至係「公益旅遊」嘅概念。

位於挪威、冰島同英國之間嘅丹麥屬地法羅群島（Faroe Islands），首府托爾斯港（Torshavn）只有約兩萬人口，但群島舊年就迎來11萬名旅客。托爾斯港目前只有兩間酒店，另有兩間起緊，旅遊業界已表明「唔想核突酒店同公寓佔領小島」，認為當局要保護當地農民同佢哋嘅牲口。

當地4月26至27號關閉群島上11個著名景點維修，但「開放畀人來做義工」。結果四日內就有約3500人申請到當地做義工協助修葺，最終100個介乎18至75歲、來自25個國家嘅遊客獲選。佢哋要自費飛去當地，喺當局指定嘅地點做兩日「工人」，「報酬」是免費食宿。

參加者分成不同組別，同當地人一齊「勞動」。其中一組去咗修建一條七公里長嘅小徑、幫手搬大石。亦有義工幫手修建觀景點，保護自然風景同鳥類保護區。雖然大家都「掛彩」，但唔少人都表示好滿足，而且喺當地搵到歸屬感。

「公益旅遊」除咗係吸引遊客嘅新方式，而且會同當地居民合作、考慮佢哋嘅需要，令當地人同環境都受益。當局計劃喺明年再推行項目。

（資料來源：香港01、明報）