JR西日本繼同三麗鷗（Sanrio）推出Hello Kitty新幹線同埋關西機場特快Hello Kitty Haruka後再度攜手合作，推出有Hello Kitty塗裝嘅大阪環狀線・櫻島線列車。
今次特別版採用嘅係323型列車，行駛期間由4月1日到9月30日，而且塗裝列車只有一卡，出現嘅具體日期同時間亦唔會事先通知。要搭車碰著它就要碰吓運氣啦！
不過就算搭唔到，大家都仲可以喺大阪站、大阪城公園站、天王寺站及弁天町站同著上制服嘅Hello Kitty同Dear Daniel合照留念。另外仲有電子印章收集、周邊商品銷售等活動。
各位Hello Kitty嘅fans，千祈唔好錯過啦！
活動官網（目前只有日文）
https://www.jr-hellokittyshinkansen.jp/osakaloopline/
（部分圖片來源：維基百科）
所謂「拚死食河豚」，河豚出名有毒，呢句話一方面說明河豚美味，死咗都值，另一方面又讚揚敢食河豚嘅人有勇氣。
食河豚最出名嘅日本，近年不斷研究幫河豚「脫毒」嘅方法。據英文《日本時報》報道，喺東北部岩手縣，有酒店用溫泉水養河豚，不但快高長大，而且養出嚟嘅河豚仲無係毒嘅。
據酒店表示，溫泉水含豐富礦物質，能促進河豚即使喺冬天都可以繼續生長，只需要養一年就可上市，比一般河豚提早半年。又由於溫泉河豚並非以海藻同貝殼類動物做食物，亦因此失去咗毒性。
酒店經理表示，用溫泉水養嘅河豚同野生魚一樣美味。佢又希望令呢種河豚發展成為當地特色，為振興日本東北作出貢獻。
同酒店合作、發明用溫泉水養河豚嘅公司，位於栃木縣，目的係為幫助人口減少嘅市鎮同鄉村復興。佢已經同另外十幾間公司簽咗特許經營協議，利用溫泉水養河豚，其中一處位於九州宮崎縣一間廢棄咗嘅學校。
根據日本環境省資料顯示，全日本47個都道府縣都有溫泉分佈，2016年溫泉數量超過27,000處。
（圖片來源：共同社）
浮世繪是日本江戶時代平面藝術的代表，內容反映當地人民的生活愛慾。在十九世紀下半葉、日本明治維新時期，浮世繪傳入西方，並影響當時的印象派、新藝術等畫派。
最近英國一名電腦系畢業生兼浮世繪愛好者 George ，結合了Openstreet Map和歌川廣重三套作品，製作成浮世繪電子地圖，讓我們可以欣賞兩百年前日本的風光。
只是地圖少了街景功能，如果能夠即時比較歌川的作品和現今周圍的景物，蒼海桑田的震撼感覺會更強烈一些。
日本櫻花季節正進入高峰，大家不妨參考一下大師，尋找最美的風景吧！
（圖片：東海道終點、京都的三條大橋。來源：立場新聞）
為咗方便唔同地區嘅遊客，好多城市都會將自己嘅地名、車站站名等翻譯成各國語言。
不過，隨住互聯網、乃至翻譯軟件嘅普及，大家都好似唔再在乎翻譯嘅質量，結果鬧出笑話。就連一直以嚴謹認真態度聞名嘅日本都難以倖免。
事關大阪地鐵嘅網站，站名嘅翻譯好有問題，例如堺筋線（Sakaisuji sen）英文譯成「Sakai Muscle Line」（筋=肌肉）、天下茶屋站譯成「World Tea House」。
就連中文網頁都一樣，例如日語的「系統別担当営業所一覧表」（分區系統負責營業部一覽表）變成「美國菌株代表處」；「あべの橋」（阿部野橋）變成「安倍晉三的橋」。
如果唔及時清理呢個問題，可能會影響到2025年世界博覽會嘅舉行。
好心畀啲錢請個翻譯啦！
（上圖為正確版本；下圖為錯版）
尋晚版主同大家分享過今年日本櫻花嘅花期預測，咁今日我哋繼續睇吓櫻花一啲常見嘅疑問！
Q1. 點解日本櫻花可以由一月到五月都有得欣賞呢？
Q2. 點解大家都話三月賞櫻花，但有啲地方二月已經有櫻花嘅？
A1 & A2. 第一個原因係因為日本由琉球（沖繩）到北海道，全長3000公里，由亞熱帶氣候到亞寒帶氣候都有，再加上日本中部屬於高山地區，令氣候更多變，所以即使同一緯度，花期亦會隨海拔有所差別。
第二個原因係，櫻花並唔係只有一種。三月用作指標嘅櫻花品種，係染井吉野櫻，而琉球（沖繩）嘅櫻花係寒緋櫻，一月就開花啦！臺灣阿里山嘅櫻花都係寒緋櫻。而喺日本本土，伊豆半島二月就有河津櫻率先登場。而即使喺東京，四月底都仲有其他品種嘅櫻花可以觀賞嘅。
Q3. 點樣知道幾時開花？咩為之「滿開」？
A3. 要決定每個地方開花嘅日子，首先要有一棵指標樹（標本木）。當指標樹有至少五到六朵花開嘅時候，就係「開花日」。而「滿開」，即係中文盛開咁解，係指花開到八成嘅時候。
Q4. 我仲聽講有一種叫「芝櫻」嘅植物，係唔係都係一種櫻花？
A4. 芝櫻不是櫻。 兩者只係花形相似啫。
佢甚至連樹都唔係，係生喺地上嘅。
每年嘅花期係喺四、五月間。富士山本栖湖以及琦玉縣羊山公園的芝櫻之丘都係欣賞芝櫻嘅好地方。
（圖片來源：日本國家旅遊局）
大家都知道日本櫻花季節差不多要來臨啦！咁最新嘅開花情況預測又係點呢？
原來根據日本三大民間機構，即係氣象協會、氣象新聞同weathermap分析，最早開花嘅福岡開花嘅日子分別係3月17日、3月20日同3月20日，而滿開（盛開）日子就分別係3月17日、3月31日同3月29日。
版主之後會同大家介紹一啲賞櫻嘅常識，例如點為之滿開？點解開花日定喺3月，有啲地方2月已經會有櫻花睇？
三大網站預測綜合網頁（開花、盛開日）
（圖片：日本國家旅遊局）
濠遊天下 Macau on Journey, 