今日下午,喺鄰埠一家清真寺外,有警察水炮車向清真寺內發射染色水炮。
而事前原訂參加遊行的嘅人士一早約定唔會騷擾清真寺。事緣有抗爭組織者前幾日被「南亞裔人」襲擊受傷,引來報復嘅憂慮。
喺呢度有幾個文化概念值得討論。首先「南亞裔人」唔一定係穆斯林。地理上南亞,包括印度、巴基斯坦、尼泊爾、不丹、孟加拉、斯里蘭卡同馬爾代夫,即係總稱「南亞次大陸」嘅範圍。其中印度有13.4億人,當中大部分信奉印度教,近年都佔人口八成上下,伊斯蘭教就係第二大宗教,有14%。
另外,錫克教雖然只佔人口1.72%,但都係印度嘅土生宗教,又因為錫克教徒男士纏頭、男性都姓「Singh」(辛格,即廣東話「阿星」,意思係「獅子」),所以大家會對印度人有刻板印象。
喺南亞國家,以伊斯蘭教為主嘅有巴基斯坦、孟加拉同馬爾代夫。尼泊爾以印度教為主,而不丹就信奉藏傳佛教。
另一個誤解係,伊斯蘭教等於阿拉伯。喺伊斯蘭教開始嘅時候,伊斯蘭教的確係由生活喺麥加嘅先知穆罕默德傳畀堅企人、親族,即係阿拉伯人,但伊斯蘭教係啟示畀所有人嘅宗教,所有人不分膚色種族都係兄弟(所以禁止教內蓄奴)。好快亦都有第一個外族信奉者。而隨住伊斯蘭教嘅擴張,不同民族亦加入伊斯蘭大家庭,包括波斯(伊朗)、突厥(土耳其)、庫爾德、柏柏爾、印度、馬來、爪哇等等。所以伊斯蘭教同基督宗教一樣都係跨民族宗教,喺同一信仰嘅基礎上,各民族仍保留自己嘅語言同習慣。另外,亦唔係所有阿拉伯人都係穆斯林,少數仍然信奉基督宗教,例如著名學者薩伊德(Edward Said)就係聖公會信徒。
至於水,即使用非宗教角度討論,水係生命之源已是定論。而喺阿拉伯地區水更係稀罕之物。而喺《古蘭經》中,阿拉伯人嘅先祖亦係靠沙漠中泉水(滲滲泉)救回性命,先可以繁衍成一個民族。
為穆斯林而言,水係真主嘅恩賜,亦係重要嘅清潔工具:「的確真主喜歡悔罪者,亦喜歡清潔者。」(2:222)。清潔嘅方法,分為無形的污穢的東西,前者視情況可透過大淨、小淨清潔,而有形的污穢的東西,根據早期信仰團體嘅眾議,就是用水。
至於大淨、小淨,都係用水清洗身體,分別在於清潔部位多少而已。但不作潔淨,不可進入清真寺禮拜。而水亦分好多等級,唔係咩水都可以潔淨嘅。依家仲係有顏色嘅水,整污糟人哋禮拜之地就肯定啦!
![](https://macauonjourney.com/wp-content/uploads/2019/10/cami-4517773_1920.jpg?w=1024)