朝早講過澳門網約車嘅最新發展，而喺地球另一個角落，英國倫敦交通局星期一亦宣佈，由於多次安全違規，唔再為網約車公司UBER（優步）續牌。

英國廣播公司引述交通局意見，認為該應用程式雖然已有作出多項改善，但讓其持牌仍然是「唔適合、唔適當」嘅。

優步前年已經被拒絕續牌，但仍然獲得兩次延期，最近一次星期一屆滿。優步表示會上訴，上訴期間仍可繼續運作。如果優步上訴失敗，部分司機預計會轉到其競爭對手，後者將迅速填補市場空缺。

倫敦交通局指優步出現多處失誤，置乘客安全於危險之中，當中包括一項系統修正，讓未獲授權嘅司機上載相片到其他優步司機嘅帳號。咁樣喺舊年年底至今年年初已然導致咗至少14,000宗欺詐個案。

交通局亦發現有被解僱或被停職嘅司機仍可以啟用新帳號載客。喺其中一個案例，有因發放兒童不雅照片而被吊銷的士牌照嘅私人出租車司機仍然能夠繼續為優步做嘢。

據資料顯示，倫敦係優步全球五大市場之一，有45000名司機，全市持牌的士及私人出租車司機就有126,000人。優步除咗倫敦以外，喺另外18個城市都有服務。