想小朋友放假對少啲電子產品？想吸收新鮮空氣、親親大自然？機會嚟啦！

由生態教育及資源中心主辦嘅「2019澳門鷺鳥節：覓鷺——親子賞鳥活動」，將於下星期六（4月27日）舉行。

根據負責人Samson介紹，中心會喺世界各地舉辦類似活動，佢哋會選擇喺當地特有、值得保護嘅物種，進行公眾教育嘅活動，透過導賞、講座等，話畀當地人知道，喺佢哋咫尺之間就已經有好豐富嘅生態環境。

至於點解要揀鷺鳥做主題物種？原來鷺鳥係一個總稱，喺澳門常見嘅都有成五、六種，仲有每年遷徒來到嘅品種。Samson話：「鷺鳥對澳門嚟講，尤其是喺近二十年間，伴隨著城市高速發展、生態破壞，佢哋對澳門都依然不離不棄。所以因著呢樣嘢，我哋覺得已經值得話畀澳門市民聽，有一種動物，無論我哋變成點都好，都依然陪伴住我哋。」

另外，Samson又話，鷺鳥亦係我哋睇一個濕地生態系統重要嘅指標性物種：「就算一個地方冇一啲明星物種，可能有一啲普通嘅物種而可以繁殖得到、有一個穩定嘅族群，其實越多咁樣普通嘅雀仔、普通嘅蝴蝶、普通嘅蜻蜓，代表嗰度嘅生態系統係完整嘅，係一個應該受保護嘅地方。」

Samson希望喺鷺鳥繁殖嘅季節，舉辦親子同樂嘅活動，拉開鷺鳥節嘅序幕。佢又話喺澳門，除咗學校教育以外，喺民間對於呢方面嘅認識同活動都比較少，希望透過活動促進親子關係，亦可以令大人同小朋友吸收一啲生態知識，「認識澳門呢個咁漂亮嘅城市、咁亮嘅生態環境。」

是次活動會用上SWAROVSKI OPTIK嘅專業望遠鏡，可以畀到參加者有更好嘅觀鳥體驗！

日期：4月27日（星期六）
時間：下午3:00至4:30
集合地點：T424 海濱圓形地/生態保護區 巴士站
費用：全免
報名：https://bit.ly/2GvGZBS

喺素有「人間天堂」美譽嘅印度洋島國馬爾代夫，上星期二傳出咗呢張震撼嘅照片：

一隻綠海龜喺地面上生咗三隻蛋，但仔細留意一下，所在地唔係我哋平時見到幼細嘅沙灘，而係灰黑堅硬嘅柏油路面！原來海龜係會記得自己出世嘅地方，長大咗就會返去產卵。

但呢隻海龜嘅家鄉已經變成一座機場。

當地媒體話海龜媽媽健康無大礙，亦已經被放歸大海。但佢以後點算？佢嘅龜BB又點算？

我哋為開發旅遊業，叫大自然付出咗幾大代價？

之前大家都講緊塑膠對於海洋生物嘅傷害，其實塑膠垃圾對陸上動物都好危險！

日本《朝日新聞》尋日報道，喺奈良公園出沒、深受遊客喜愛嘅奈良鹿，都成為塑膠嘅受害者。

喺上個月23號有路人通報，表示「東大寺附近有鹿無法起身」。呢隻大約17歲、重30公斤、長79公分嘅雌鹿隨後被送去保護，但喺第二日上晝就死咗啦。「奈良之鹿愛護會」27號對鹿屍進行解剖，喺胃入面發現重3.2公斤嘅異物，據研判係膠袋纏繞所形成嘅聚積物。

愛護會獸醫丸子理惠話：「虛弱嘅鹿胃入面有垃圾，雖然會有咁嘅情況發生，但很少會出現咁多垃圾。呢隻鹿可能係因年紀大而衰老，不過佢體型好瘦，毛色亦唔好。」佢估計應該係胃內面塞住膠袋，令隻鹿無法攝取足夠養分。

（攝於2017年1月，非受害動物）

比利時首都布魯塞爾係歐盟同北約嘅總部所在地，係西方政治軍事權力嘅重地。但講到當地最有名嘅「人物」，相信非「尿尿小孩」（荷蘭語：Manneken Pis，法語：le Petit Julien）莫屬了。每日都有世界各地嘅遊客到來，同佢合照留念。

最近「尿尿小孩」都跟上環保之風。一個小銅像可以點環保？咪就係佢啲「尿」囉！

原來，最近有個技工發現，自1619年銅像樹立喺呢度以來，啲「尿」係飲用水，仲直接排落下水道，年中浪費嘅食水達1,000至2,500公升咁多呀！

所以當局上星期採取行動，幫雕像加一條道管回收「尿尿」。市內其他噴泉都會跟進改善。

---

尿尿小孩前往方法：

位於布魯塞爾市中心大廣場西南、烘箱街（Rue de l’Etuve / Stoofstraat）和橡樹街（Rue du Chêne / Eikstraat）交界。自大廣場步行4分鐘即達

（2014年8月攝於布魯塞爾）

近年來隨著塑膠對海洋生物的危害以及對海洋產生污染引起全球關注，各國開始採取行動「走塑」。

代表歐洲聯盟28個成員國的歐洲議會全體會議，前日以560票贊成、35票反對、28票棄權，通過於2021年起，禁止在餐具、飲管、棉花棒等產品使用一次性塑膠。

另外，成員國要在2029年達到膠樽回收率90%的目標，而到2025年膠樽的成份至少要有25%的回收材料，2030年更提高至30%。

至於面臨「脫歐」的英國，如果進度繼續拖延，將要執行相關規定。根據英國《衛報》報道，環境大臣高文浩（Michael Gove）也表示願意限制一次性塑膠。

（圖片來源：Freepix）