大家日後北上，坐長途大巴，可能再唔會人手一張車飛啦！

事關內地交通運輸部近日發佈咗《2021年推廣道路客運電子客票服務工作方案》，目的係為加快推進全國道路客運電子客票普及應用，全面提升乘客購票乘車便捷性。

方案提出喺總結相關省份道路客運電子客票試點工作經驗嘅基礎上，按照「統一開發、複製推廣」的模式加快推進電子客票系統推廣應用，持續擴大電子客票應用範圍，逐步構建部、省兩級聯網運行嘅全國道路客運電子客票系統，持續改善乘客出行體驗，更好咁滿足乘客快速化、便捷化嘅出行需求。

具體喺遼寧、吉林、浙江、福建、湖南、重慶、四川、雲南、新疆等省（市）深化開展道路客運電子客票推廣應用，依託道路客運行業智能服務設施設備嘅應用和普及，提供無接觸式、無紙化客運服務，實現20個以上省份普及道路客運電子客票服務，為2022年全面普及道路客運電子客票打好基礎。

而內地普速鐵路喺舊年6月20日亦已經推行車票電子化。

清明復活節長假期將至，大家可能會考慮去廣東玩個三四日。依家有個好消息！

中旅巴士日前宣佈，自3月27日（本周六）起，恢復澳門（珠海）至肇慶／三水／四會嘅班車。

澳門（珠海拱北汽車站）至肇慶每日兩班，分別早上10：30同晚上7：05開車，在肇慶分別停星湖大酒店及國際大酒店。肇慶返拱北汽車站亦都係每日兩班，國際大酒店開車時間係早上7點同下午2：40，而星湖大酒店開車時間係早上7：15同下午3：00。肇慶出發單程票最低60元人民幣，澳門出發單程100元。

澳門（珠海拱北汽車站）至三水／四會每日兩班，分別早上11：25同晚上7：15開車。第一班車停靠三水中旅同四會汽車站，第二班車停靠三水中旅同三水廣場前途酒店。三水／四會返拱北汽車站亦都係每日兩班，第一班車由三水中旅出發，開車時間係早上6：50（7：00停靠獅皇麗星華廷酒店，7：10停靠三水廣場前途酒店），而第二班車由四會汽車站出發，開車時間係下午3：00（3：50停三水中旅）。肇慶出發單程票最低60元人民幣，澳門出發單程95元。

肇慶歷史悠久，有超過一千四百年歷史，尤其是鼎湖山，保護區森林面積高達78.8%，空氣相當清新。趁住春天，萬物生長，去「大灣區後花園」嚟一個洗肺之旅，都係唔錯嘅選擇。

港珠澳大橋穿梭巴士宣布，由4月1日開始從珠海及澳門經港珠澳大橋往香港的「金巴」班次，將由原本10班縮減為每日六班。

珠海／澳門往香港的車次均為10:30、12:00、14:00、16:00、18:00及20:10。而香港往澳門珠海，目前每日六個班次維持不變，同樣是10:30、12:00、14:00、16:00、18:00及20:10開車。

港珠澳大橋穿梭巴士提醒乘客，必須先於公司微信公眾號或登入網頁 www.hzmbus.com 預購車票，現場不設售票。

電視劇《十月初五的月光》中，飾演「初哥哥」嘅張智霖踩電單車衝落大三巴牌坊下嘅68級石階，堪稱當中嘅經典場面。

不過喺現實中，咁樣做係唔得嘅。

治安警察局尋日喺社交網站專頁透露，日前有市民喺社交平台上發佈一則關於有人喺大三巴牌坊樓梯駕駛單車嘅帖文。經澳門警務廳人員調查後，成功鎖定三名涉案人士，並傳召佢哋到局跟進。

三名菲律賓籍外僱，年約20多至30多歲，都承認為事件中嘅駕駛者。由於佢哋涉嫌違反《道路交通法》中規定，局方已對佢哋作出檢控。

治安警察局呼籲：駕駛者應顧及行人安全，為免釀成交通意外，切勿於行人道駕駛任何機動車輛或單車，違者可被科處罰款600澳門元。

去加拿大或者北歐旅行，經常都會遇到警告牌，提醒司機注意橫過路面嘅野生動物。而駝鹿就係其中一種。

不過喺加拿大艾伯塔省嘅賈斯珀（Jasper），最近就有新嘅警告牌：「Do not let moose lick your car」，意思係：咪畀駝鹿舐你架車！

當地國家公園發言人就話，啲鹿舐汽車就係要攝取黏喺車身上嘅鹽份。因為喺北方地區，為咗防止路面積雪影響道路安全，一般會喺路上灑鹽。

不過任由鹿舐汽車對人對鹿都好危險。因為咁樣佢哋會習慣咗汽車嘅存在，容易造成鹿同車相撞。

發言人指近年由於「打卡」嘅熱潮，人類更主動去接觸野生動物，冇同動物保持應有嘅距離。佢亦留意到近年駝鹿嘅天敵——狼嘅數量少咗，駝鹿數量亦都因此增加咗：「亦即係話我哋要尊重佢哋，給予佢哋空間。」

發言人提示，避免駝鹿靠近汽車嘅最好方法就係見到佢就行開。園方又強調，喺公園內開車要留喺車上，避免同野生動物有互動。

不過如果真係有動物舐緊你架車，發言人都話無乜選擇可言：「我哋明白有時需要耐性。最安全嘅做法就係留喺車入面。」

另外喺日本都有野鹿舐鐵路路軌嘅情況，原理同駝鹿舐車一樣，目的係要攝取鐵軌嘅鐵質。當地交通部門就嘗試利用狗吠聲嚟驅散鹿群。

足球有一個術語叫「泊大巴」，即所有球員回防，就好像把一台大巴泊在攻擊球員面前。

而在日本有一家旅遊巴公司，把平日泊得整整齊齊的旅遊巴，泊成一個迷宮，供人遊玩。全長600公尺的迷宮是由60台高3.8米高的大巴組成，只是在剛過去的「秋分之日」假期期間開放。

公司更推出長達五小時的半日遊套票，除了大巴迷宮外，還可以參觀巴士通風的過程示範，讓對巴士安全性有疑慮的人士安心。另外會參觀全球最大室內微縮主題公園Small Worlds Tokyo。套票優惠價4980日元（折合約377澳門元）。一推出近乎瞬間售罄！

其實最近大半年，同受疫情影響的本地旅遊業可謂停滯不前。政府推出的本地遊計畫固然幫到業界「有工開」，亦為主題旅遊、更多元化的旅遊產品開了個頭。只是有點可惜，業界似乎沒有考慮以更具創意的方式去為行業殺出一條新路。希望計畫結束後，政府和業界都能總結經驗，為旅遊產品的多元化以至旅遊業的創新繼續努力。

（產經新聞 / TBS / TheSmartLocal）

位於德國、比利時同法國之間嘅小國盧森堡，今日開始所有公共交通，包括鐵路、巴士、電車，全部免費，而且居民、旅客都能受惠，係全球首例。

新措施目的是要鼓勵居民多使用公共交通、減少塞車，而而成本將會由稅收支付。原來車票收入只佔當地交通預算8%。但措施只限國內使用，一旦出境仍然需要畀錢買飛。頭等火車飛亦需要付費購買。

當地亦不斷完善交通基建，例如連接首都同機場嘅電車已經喺2017年啟用，當地亦計劃興建長達2586公里嘅單車徑網絡，並將停車轉乘車位增加一倍。喺交通投資方面，2018年2027年將投入40億歐元，務求應付喺2025年增加兩成嘅公共運輸需求。

根據當地2018年嘅民意調查顯示，汽車佔當地商務出行47%，佔休閒運輸的71%。至2030年當地公交將會電動化。

人口61萬4千嘅盧森堡雖然是歐洲面積最細嘅國家，但係係歐洲法院嘅所在地，每日都有來自德國、法國同比利時嘅人往來。由於薪資優厚，當地人口增長強勁，接近一半人口係外國人，其中18%係葡國人，而法國人佔13%。（德國之聲）