葡國傳奇足球球星C朗拿度期間限定的博物館七月將會在香港開幕。不過澳門原來曾經是潛在的選址之一。經濟財政司司長戴建業回應澳門爭取失敗時表示：「我諗葡語國家唔只一個足球明星，遠遠多過你講嗰個。」

立法會上星期三舉行經濟財政領域施政方針辯論。直選議員高天賜談及澳門的葡語系合作平台角色時，爆料指「C朗拿度（去）香港開博物館，你應該有請柬啦？你應該去吓啦！睇吓你覺唔覺得醜呢：點解（香港）會搶咗去？以我所知，佢嚟過搵過澳門其中一家（賭牌）承批公司，拒絕咗。」他質疑政府如何監督？

戴建業回應時表示：「至於你話，頭先足球嘅明星。我哋亦都係組織緊。我諗葡語國家唔只一個足球明星，遠遠多過你講嗰個。」他又指在足球有很多資源尚待發掘，也可以用好。部門的同事也在積極籌備當中。他又反駁指「唔係淨係開間pop-up store就可做到」，指在足球業務還有很多可以做，「（例如）培訓學校，都有很多大品牌都可以用到，它們的資源也很豐富。」

對此澳門及香港的網民都有熱烈討論。有網民批評錯過了帶動經濟的機會。另外有網民指「鬼唔知有好多足球明星咩，不過最出名係佢（C朗）呀嘛」、「但係世界只得一個C朗，點解咁冇Common Sense嘅嘢都講得出口？」、「最主要的是C朗是葡國人，呢樣野好能代表澳門的中葡友誼，做官最忌以為自己好叻，一副高高在上的態度」，又認為官員應該有問責制。前立法議員、一直關注本地體育發展的蘇嘉豪亦在社交媒體串提醒戴司長：「腦袋是個好東西。」不過也有網民懷疑戴司長是阿根廷球王美斯的球迷。

不過亦有網民指：「如果係大陸大把地其實唔介意。澳門起野要諗好多野，當然澳門官太串唔認真解釋都係唔應該」、「巴西都係講葡語的，佢又無講錯。不過巴西同澳門無乜關係就係了。」。有網民進一步分析：「澳門做好賭場同演唱會就得，其他野成本高回本慢」，又擔心「牙朗（C朗）啲簽名費一定好高。」亦有網民愛國心上身，「澳門要起只可以起馬龍博物館、全紅蟬博物館」、「我哋咁愛國，整返個武磊博物館丫笨。」