早前濠記曾經提過澳門特區護照世界排名第三十三，有超過140個國家和地區給予免簽證等待遇。不過即使獲眾多地區出入境優惠，一旦給予政策的國家更改政策，而本地訊息更新速度不夠快，就可能會連累市民損失早已安排好的假期！

近日有網民在社交媒體串（又稱為脆）發文，指同為特區，澳門特區護照持有人與香港相比所享有的對待是「天同地比」。

事源事主計劃飛印尼峇里島度假，指當時澳門身份證明局網頁列明持特區護照可以在當地辦落地簽證，於是打算透過落地簽證入境當地。

事主到達峇里島後，才得知印尼有新政策，在十日前已經將澳門剔除可以搞落地簽證的國家和地區名單之內，需要提前辦理簽證。當時身份證明局官網最後更新日期是11月8日，「即係話呢個新政策印尼開始咗之後，政府係冇更新過任何嘅消息。」

事主致電旅遊局，對方表示未有收到通知，反問航空公司為什麼未有提醒事主。旅遊局職員著事主聯絡身份證明局，但到要辦公時間才有人接聽。而聯絡駐澳門印尼辦公室，對方亦表示未有收到任何消息。事主再致電印尼駐香港總領事館，才確認有新政策：「新政策只有澳門特區護照受影響，香港及台灣地區完全冇問題，可以如常入境」。

事主提出了兩種可能性：

「一、係澳門政府冇收到通知？ 即係人哋國家當你呢個地方唔入流啦，完全唔同你講聲就block（撤銷）咗你落地簽。

二、澳門政府有收到通知？ 新政策開始到而家十日，有收到通知但係完全冇更新過官方網站，同埋冇出過任何新聞稿。我哋市民係乜嘢呢？諗住唔會有人入去印尼？」

事主更批評：「仲要打返去政府話而家係非辦公時間，冇人幫到我……睇住同班機嘅揸香護照入境順利去玩。」自己卻要被印尼當局遣返，等一下班機回澳。

事主最後總結，指體驗到國際關係下，澳門特區護照「真係一個笑話」：「澳門人在外，有咩事自求多福」。

身份證明局的網頁目前已經刪除了有關印尼落地簽證的訊息。

事主其後續指：「今日過境香港入境處，人哋查問都問點解澳門政府冇相關資訊俾你哋查咩？印尼海關叫我返澳門投訴。」事主表示，澳門政府真係「柒出國際啊」（丟臉丟到國外），「平時民生搞唔掂都算啦，我揸住個澳門護照今次出去俾人笑啊，就係你哋政府冇更新，旅遊局又射波返俾身份證明局，身份證明局又冇人返工，真心搞笑。」

事件引起網民討論，有網民批評印尼和澳門當局：「好明顯印尼政府唔care（在乎）澳門呢個細地方，所以改政策都唔通知。政府相關部門自己又無跟緊啲相關消息，咁就玩死啲市民。」不過亦有網民指事件中航空公司亦有責任：「佢哋有義務Check（檢查）你啲護照、簽證睇吓去到當地可唔可以合法入境。」

有網民分享了前往紐西蘭的經驗：「打去身份證明局都無用，（嗰）度（啲）人原來都係（唔）識（㗎）。我之前去紐西蘭都係問過航空公司、 旅行社、身份證明局、都是無答案，最後都係自己搞左簽證先穩陣起見。」亦有網民坦言「突然想到有葡證（葡國護照）都有是福氣。」

至於被問到這次事件，事主有沒有嘗試像在不少東南亞國家那樣以錢「疏通」？事主指「開頭都有咁諗過，所以同佢講話可唔可以加啲錢做個快啲嘅簽證，暗示可以俾多啲錢，佢哋一嘢就reject（拒絕）我。」有網民就表示：「呢啲咁嘅第三世界國家，旅遊可免則免。」