農曆大年初一，濠記祝大家身體健康，萬事如意！

大家初一初二拜完年、食完開年飯，初三可能想出吓街行返個大運，或者香港朋友想嚟久違嘅澳門走一轉。濠記實地考察，向大家推介澳門全新三大熱點同活動！

首先當然係城中熱話「新馬路任我行」啦！濠記坐巴士，喺殷皇子馬路落車，到南灣十字路口，望見新馬路大西洋行人路已經好多人。喺龍嵩街口，就有一塊標示「禁止駛入」嘅路牌樹咗喺度，仲有市民喺前面影相，紀念歷史性一刻。

平時車水馬龍嘅新馬路，如今竟然係行人川流不息嘅景象。除咗馬路中間有座椅供人休息外，亦有巨型福兔，同其他裝置藝術供大家合照留念。兩傍仲有澳門非物質文化遺產演示，好似係龍鬚糖、印章製作，警察銀樂隊及各表演單位演奏，以及具澳門嘅特色文化創產品、小食攤檔，行到有啲餓有啲頸渴都可以解決一下。

活動詳情
時間：至1月24日晚上10時
交通：建議乘坐巴士，於「中區/殷皇子馬路」、「十六浦」、「內港客運碼頭」、「粵通碼頭」等站下車
進入活動日程

【延伸活動】喺爐石塘街同善堂歷史檔案陳列館而家有「同歌善舉：——一百三十年的善堂回憶歷史專題展」。適逢同善堂成立一百三十周年兼最近獲得金蓮花榮譽勳章，有機會認識澳門呢間華人慈善組織與時俱進的發展歷程，同時欣賞陳列館內的建築，實在難得。

展期：至5月31日
開放時間：9:30-17:30，逢周二及法定假期休館
費用：全免
地點︰庇山耶街 55 號同善堂歷史檔案陳列館
進入虛擬展覽網址

---

大三巴牌坊係澳門嘅標誌性建築物，亦都係澳門中西文化交流嘅見證。我哋而家見到嘅只係當年教堂嘅前壁，咁不過大家又有冇諗過當年教堂係點嘅面貌呢？

文化局目前喺大三巴舉辦「時空穿梭，遊歷三巴」——大三巴牌坊沉浸式數字體驗展」，結合裸眼3D、虛擬實境及擴增實境等擬真技術，對一百多年前被大火焚燬嘅教堂進行數碼復原。濠記亦親身到過現場體驗。

活動開始時首先會觀賞一段有關教堂歷史嘅短片，然後每位觀眾都會獲發一副眼鏡，就算係深近視嘅濠記戴住都好清晰，然後用手上嘅操控桿，就可以進入教堂，按照指示「參觀」教堂內各個廳堂，並且參加遊戲，協助修復教堂內嘅建築同聖像，成功完成仲可以獲得一張入場券，參加聖堂內嘅彌撒！

能夠將已經如今已經消失嘅建築重現眼前，係一件好美好嘅事，亦都可以令人參觀牌坊時候更有興趣，收獲更多。聽講下一步將會再復原昔日聖像出遊嘅情景。濠記十分期待！

活動詳情
展期：至2月28日（年初一至年初八期間各場體驗將以現場報名方式供公眾即場輪候參與，公眾毋須預先網上預約）
開放時間：每日上午9時至下午6時（下午5時30分後停止入場），每小時三場
注意：使用者需年滿5歲或以上，未年滿12歲的參加者需由1名成年人一同登記及陪同入場

---

炮竹、神香同火柴係澳門三大傳統手工業。如今，隨時代變遷，佢哋都已消失，其中只有氹仔益隆炮竹廠嘅遺址仍然保存完好，經過修葺，炮竹廠遊徑喺舊年年底開始對外開放。

沿住遊徑漫步，細葉榕、假菩提樹、樟樹成蔭，又有水池、河涌，唔係當中嘅石屋，你可能會以為呢度係個大公園。打開各石屋介紹牌附有嘅二維碼，就可以了解當年炮竹的生產過程，以及工人冒住生命危險工作嘅情況。如果大家喺官也街行得攰，呢度都係一個好舒服嘅休息地方。

益隆炮竹廠
開放時間：遊徑每日上午6時至晚上7時，展覽館及文創禮品店每日上午10時至晚上7時
地點：氹仔飛能便度街