各位澳門朋友，唔知你有冇聽過「數碼牧民」（digital nomad）呢種工作概念呢？

其實「數碼牧民」一詞已經有25年嘅歷史，而最早實踐呢個概念嘅人最早喺1983年已經出現咗。只需要一部手提電腦同手機，同埋高速無線網絡，就可以擺脫地域界限，喺世界各地游走。多數「數碼牧民」通常鍾意喺生活成本較低但通訊設備完善嘅地區居住。

近來世界各國都推出專門嘅工作簽證，吸引「數碼牧民」去生活。澳門人熟悉嘅葡國上星期亦公佈咗最新「數碼牧民」簽證計畫嘅細節，計畫將於本月三十日正式實施。

根據計畫，持有「數碼牧民簽證」嘅人士可以喺葡國居住一年，之後可以續期五年。申請時需出示稅務居民證明，即係證明你要繳交邊個地方嘅稅項，以及提供僱傭合約。如果你係自僱人士，就需要提交相關證明。當局對申請人過去三個月平均月收入亦有要求，至少要係當地每月最低工資（目前是705歐元，折合約5,541澳門元）嘅四倍（即2,820歐元，約澳22,165門元）。

不過，以葡國嘅生活水平，呢個收入要求可能會偏高。唔使驚，仲有更吸引嘅選擇介紹畀大家：

印尼峇里島：目前可以申請最長為期半年嘅簽證，只需要持有效旅行證件、最少2,000美元嘅生活費，回程機票，以及護照相即可申請。期滿後可延長簽證有效期至五年，當局更計劃延長簽證有效期至最多十年。

哥倫比亞：繼巴西同阿根廷後，另一個南美洲國家哥倫比亞下星期起亦都會推出「數碼牧民」簽證，有效期兩年。每月收入門檻為684美元（折合約5,530澳門元）。

拉脫維亞：如果嫌南美洲環境太複雜，葡國又太貴，另一個歐盟國家、東歐嘅拉脫維亞都有「數碼牧民」簽證計畫。但計畫要求申請人受僱於喺經合組織（OECD）國家註冊嘅公司，月薪至少要係當地最低工資兩倍。

相關連結
葡國政府有關數碼牧民簽證要求介紹