尋日澳門同聖多美和普林西比阿瓜格蘭德大區締結成友好城市。好多人都對呢個「阿瓜格蘭德」，同埋呢大區所在嘅國家好好奇。就由濠記打開資料室，同大家介紹呢個非洲國家啦！

聖多美和普林西比（São Tomé e Príncipe），全稱聖多美和普林西比民主共和國，簡稱聖普（STP），位於非洲大陸西部幾內亞灣對開。主要由聖多美（São Tomé）同普林西比（Príncipe）兩個主島，以及其他附屬島礁組成。

聖普面積1,001平方公里，相當於33個澳門，人口只有22萬3千多人，不到澳門嘅三分之一。係非洲面積同人口第二細嘅國家，只係比東非嘅島國塞舌爾大。當地大多數人係非洲人、葡非混血兒，另有少數葡人及華人。葡語係官方語言，大多數人信奉天主教。首都聖多美（São Tomé）位於聖多美島上，同時亦係「阿瓜格蘭德」（Água Grande）大區嘅首府。

地理與自然

聖普係古代火山爆發形成嘅島嶼，但當地已無活火山。聖多美島最高峰係聖多美峰，海拔 2,024米。沿海地區屬於濕熱氣候，但受到海風調節，高溫甚少超過32°C，高地較為涼爽。年平均雨量從北部的800毫米到高地雲林區嘅7000毫米不等。聖普無原生大型哺乳動物，但有多種當地獨有嘅雀鳥同植物，當地亦係海龜產卵嘅熱門地點。

歷史

聖普喺1470年被葡國人發現之前一直無人居住。葡萄牙人喺非洲大陸帶來黑奴，以種植甘蔗煉糖為主要經濟活動。後來糖業因外來競爭衰落，改為種植咖啡同可可，後者更成為當地嘅主打產品，亦曾淪為奴隸轉運中心。但當地嘅非洲人幾百年來一不停反抗，直到1975年獲得獨立，同一年同中國建交，但1997年至2016年一度斷交，到2016年底兩國恢復邦交。

經濟、社會、文化

聖普傳統上以農業為主，特別係可可豆，佔咗農產品出口95%。另外亦出口渦輪發動機、飛機零件等。海洋石油以及旅遊資源開發亦有潛力。主要出口到葡國、安哥拉、中國等。

聖普係撒哈拉以南非洲社會發展最先進國家之一。當地識字率高達九成，人均壽命亦超過70歲。文化上結合咗非洲同葡國文化，早在十九世紀末已經開始出現本地文學作品。當地飲食以海鮮和熱帶作物為主，口味偏辣。當地最受歡迎嘅體育運動係足球。

景觀與旅遊

首都聖多美係建於1493年，喺非洲最古老嘅殖民城市之一。主要建築物有總統府、天主教主教座堂，以及前身係城堡嘅博物館，裏面設有一座燈塔。

赤道正好穿過聖普南面嘅斑鳩島（Ilhéu das Rolas）。島上亦有赤道紀念碑。當地另一個重要嘅自然景觀係聖島南部嘅大狗峰（Pico Cão Grande），孤峰拔地而起，針狀外形非常獨特。

• 中國、香港特區、澳門特區護照持有人可以申請落地簽證，逗留最多15日。葡國護照、英國護照可免簽證逗留最多15日。
• 從香港出發前往聖普，最少要轉兩程機（經卡塔爾多哈同加納阿克拉或安哥拉盧安達），最短需時24小時。
• 當地嘅貨幣係多布拉（Dobra），同歐元掛鉤。一多布拉兌換0.34澳門元。
• 當地不屬於黃熱病高風險區，但屬於瘧疾高發區，出發前應先服用抗瘧疾藥物。