之前喺台灣留意到一則新聞，話當地有一批黃熱病疫苗即將到期，開放民眾喺今個月內免費接種。

咁其實黃熱病係一種乜嘢病呢？黃熱病（yellow fever）係一種病毒病，經由蚊叮咬傳播，潛伏期三至六日。大部分患者可以係無或只有輕微病徵。部分患者會出現發燒、肌肉疼痛（尤其是背痛）、頭痛、食慾不振和噁心或嘔吐。大多數患者情況會好轉，病徵並喺 3 至 4 日後消退。患者痊癒後一般可產生免疫力，唔會再受感染。然而，有小部份患者會轉化成嚴重疾病，例如高燒、黃疸病、出血、休克同多重器官衰竭。一啲個案亦可能會出現繼發性細菌感染。嚴重病例死亡率為 30 至 60％。

黃熱病目前喺西非同中南美洲國家屬風土病。要前往呢啲國家旅行，以及曾經去過有風險地區國家嘅人，入境呢啲國家嘅時候當局會要求你出示黃熱病疫苗接種證明。中國內地會要求從疫區入境或曾在疫區轉機、年滿9個月或以上的入境人士出示接種證明，但相關規定不適用於入境香港及澳門。

咁澳門有冇黃熱病疫苗打呢？係有嘅。

濠記之前去過衛生局查詢過黃熱病疫苗嘅事。喺澳門，塔石衛生中心同氹仔海洋花園衛生中心都有疫苗接種服務。

成個接種流程係咁嘅：

• 首先要同衛生中心確認有冇疫苗存貨。
• 如果有，去到衛生中心，喺「非預約門診」掛號。
• 喺經過量血壓等診前程序後，同醫生講你要打黃熱病疫苗。醫生會問埋你旅行嘅目的地，因為一啲地區除咗黃熱病疫苗之外，可能仲會要求其他疫苗嘅接種證明。

而目前一支疫苗嘅價錢係364澳門元。只要接種一次就可以終身免疫。

最後提提大家，接種疫苗嘅時候要帶埋護照，因為要將你嘅護照號碼寫喺國際針卡上面。醫生亦都提醒，如果要前往有風險地區，建議喺出發之前一個月（至少10日）接種疫苗。

（資料：澳門衛生局／香港衛生防護中心）