濠記之前同大家分享過最新嘅全球旅行安全指數。今次就同大家分享全球性小眾旅行安全指數。

根據有關研究機構最新嘅排名，澳門喺全球203個國家同地區當中排名102，處於中游位置。加拿大排名第一，而位於東南亞嘅伊斯蘭國家汶萊排名最後。

研究機構研究各地法律，並收集據權威性國際機構嘅數據，按10個指標對各國進行評分，分別係同性婚姻、職場上對性小眾嘅保護、法律上保障、針對性小眾暴力行為、收養子女、跨性別身份認定、跨性別謀殺率、同性性關係刑事化，討論性小眾議題空間，並參考蓋洛普民調，有關個別國家或地區是否適合性小眾生活嘅問題。

澳門雖然並冇禁止同性性關係，亦冇禁止討論有關議題，但係喺同性婚姻、職場上對性小眾嘅保護、法律上保障、針對性小眾暴力、收養子女五方面都不受保護，又引述民調指只有25%或以下嘅澳門人認為澳門係適合性小眾生活嘅地方。報告亦指出喺澳門改變性別身份無需進行性別重置手術。澳門整體得分40分，級別屬於D級。

排行榜頭30名嘅國家同地區除咗智利、阿根廷同哥倫比亞之外，全部都位於歐洲、北美洲同埋大洋洲，而只有五個國家屬於最高級別嘅A級。其中澳門嘅前宗主國葡國排第五。排名較高嘅國家同地區幾乎全部都已經承認同性婚姻，或者承認僅次於同性婚姻嘅民事結合，並且對不同性取向及性別身份認同給予保護。

亞洲地區排名最高嘅是第35位嘅以色列，泰國排名第60。大中華地區排名方面，最高嘅係已經承認同性婚姻嘅台灣，排名第44，中國內地排名第107。至於鄰埠香港就排名72。

雖然南非排名第21，但絕大部份非洲、東南亞同中東國家整體評分仍屬F級「不合格」類別。排名最後五位其中有四位係全面或部份實施伊斯蘭法嘅國家。其中喺汶萊，當地喺2019年通過刑法，同性性行為可以判處投石死刑。另外英國喺前殖民地實行嘅法律對性小眾亦有負面影響。

另外俄羅斯排名第132，研究指出當地性小眾組織遭法律懲罰，又指當局禁止向兒童「推廣非傳統性關係」。烏克蘭排名第83，但仍在歐洲地區排名偏後。北韓及梵蒂岡並未列入今次排名。

研究亦向性小眾遊客提出37項旅行建議，包括了解目的地相關法律、備齊文件、盡量集體行動或參加為性小眾設計嘅行程、刪除約會程式定位功能等。研究又提醒，某些保守國家嘅旅遊區，例如印尼嘅峇里島，對於性小眾嘅態度會比較寬容。

報告全文