【泰國已於2022年10月1日起全面恢復正常入境手續。】

【6月17日更新：7月1日起取消泰國通行證及強制購買旅遊醫療保險。】

【5月21日更新：6月1日起，未接種疫苗人士可免隔離入境，但可以選擇抵達時接受抗原檢測或出示72小時內有效的病毒檢測陰性報告。另外屆時入境泰國仍需申請泰國通行證。】

【3月19日更新：4月1日起，無論透過AQ、沙盒或免隔離方案入境，都無需進行出發前病毒檢測。AQ及沙盒計畫日數縮短至五日，沙盒計畫新增清邁和佛丕府。禁止食肆賣酒的府由44個減至20個，但夜場繼續關閉。部分潑水節可以進行。】

【2月24日更新：3月1日起，採用免隔離入境方式的旅客，入境後第五日核酸檢測將由自我進行抗原檢測並上報取代。保險保額亦減至20000美元。】

泰國今個月初重新開關，最近好多人好關心開關嘅情況。一來泰國係好多澳門人熱門嘅渡假勝地，二來相對於日本，泰國情況比較穩定，而且泰國開關措施已經實行咗一段時間，而日本要到下個月先會重開邊境，而且只會限於商務客同留學生。

雖然為咗避免感染風險、避免增加本地同外地醫療負擔，亦唔想浪費時間隔離，濠記個人唔會喺現階段出國，亦唔會建議大家無必要理由、純粹為咗去玩而出國，但喺早前關於泰國開放澳門人入境嘅報道，有朋友留言想詳細了解相關政策，濠記亦都搜集、整理咗相關資訊，同大家分享。

入境模式與所需文件

目前入境泰國有三種模式，第一種係替代性隔離（Alternative Quarantine, AQ），適用於無疫苗接種證明人士，入境後要喺酒店隔離最少七日。第二種係沙盒計畫（Sandbox Programme），旅客入境前需接種疫苗，頭七日無需全程留喺酒店，但需要喺指定範圍內活動，七日後先至可以前往泰國其他地區。至於第三種就係大家最關心嘅免隔離入境方案（Test & Go）啦！

無論係以以上邊一種方式入境，所有入境人士都需要有三樣文件：「泰國通行證」（Thailand Pass）、72小時內發出嘅核檢陰性報告，以及醫療保險保單。

申請泰國通行證

「泰國通行證」最早出發前60日起可申請，但建議最遲出發前七日提交申請。以Test & Go為例，申請時需要：

1. 護照及簽證（港澳特區護照持有人、葡國護照持有人入境泰國免簽證）
2. 疫苗接種證明（18歲及以上人士須完成接種至少14日；有家長陪同嘅18歲以下人士無需接種。已康復人士須至少接種一劑疫苗至少14日並出示康復證明）
3. 保額至少五萬美元嘅醫療保險（包括行程全部日數外加10日，應保項目包括住院、隔離、檢疫等治療及相關費用）
4. 第一晚及第五晚隔離酒店訂房單（包括第一日機場到酒店車費，以及第一日及第五日共兩次檢測費用）。當局建議與酒店直接訂房，可接受嘅酒店類型包括有SHA Extra Plus (SHA++)、AQ、OQ或AHQ認證嘅酒店。
5. 經過酒店和泰國疾控中心核實批准，通行證將在七日內以二維碼形式以電郵發給旅客。
6. 申請泰國通行證無需繳交任何費用。

運作流程

入境時，旅客須出示泰國通行證、醫療保險保單、疫苗接種或康復證明、隔離酒店訂房單，以及72小時內發出的核檢陰性報告（六歲以下有家長陪伴嘅小童可獲豁免），並進行包括量度體溫等入境篩查。完成清關手續後接受第一次核酸檢測，然後直接前往酒店（六歲以下小童只需要在入境時接受唾液測試），得出陰性結果即可自由活動。

旅客在泰國境內應該嚴格保持個人衛生，包括公眾場所戴口罩、清潔雙手、保持社交距離等，並使用追蹤應用程式。如果要到泰國其他地區旅遊，亦須出示核檢陰性結果。

旅客會會喺第五日透過追蹤程式收到提示，前往檢測中心接受第二次檢測，然後須在預訂好嘅酒店房間等候測試結果。如果在泰國逗留期少於五晚，或在第五日或以前出境，除非航空公司或下一個目的地有規定，則無需進行第二次檢測。

旅客出境亦須接受篩查，並向負責人員呈交所需文件。

保險與航班

至於旅遊保險方面，大家要留意有無包「無症狀感染」。個人比較推薦安盛的保險，30日，保額50000USD，包無症狀感染，收2408THB（折合601MOP）。最重要係，安盛喺澳門有分公司，有事都好溝通啲啦！

另外要注意嘅係，目前要去泰國只能經新加坡轉機。由於泰國被香港定義為A組指名地區，非香港居民不能經香港入境，澳門人要前往泰國唔可以經香港。而直航去泰國預計最快3月4日開始有航班。

有用連結
泰國通行證申請入口
泰國SHA酒店、泰國AQ酒店名單
安盛Sawasdee入境旅遊意外保