今日大年初一，祝各位讀者身體健康、大吉大利！今年係壬寅虎年，當然就要講吓今年嘅主角老虎啦！

虎，俗稱老虎，係世界上最大嘅貓科動物，同獅子、豹等同屬豹屬。老虎係亞洲特有嘅動物，歷史上西至裡海、土耳其一帶，北至俄羅斯西伯利亞，南至印尼蘇門答臘、爪哇、峇里，都有老虎分佈。但由於人類獵殺同棲息地受破壞，目前全球野生老虎數量只剩下3900隻，其中印度佔超過一半。全球已知九個虎亞種中，爪哇虎、峇里虎同裡海虎已經絕種。中國特有嘅華南虎亦已經被認為喺野外絕跡。

另外，白虎係孟加拉虎中，由於基因突變，導致原來赤黃色體毛變為白色嘅現象，並非白化病。而基因進一步突變就會產生雪虎，連黑色條紋都消失。

老虎生活嘅環境非常廣泛，由森林、草原到沼澤都可以發現老虎蹤影。同所有貓科動物一樣，老虎係掠食性食肉動物，具有敏銳嘅聽覺同夜視能力，利用帶有黑色條紋嘅棕色皮毛將自己隱藏喺草叢密林中，以尖銳嘅爪同犬齒捕獵各種鹿、野豬、水牛等動物。老虎亦係少數唔怕水嘅貓科動物，需要有水供佢哋大熱天時能夠沐浴。

老虎係獨居嘅動物，領域性極強，平時會以體味來標記各自領域範圍，成年老虎隨時都可以交配，但雌虎發情期只有幾日。雌虎懷孕期103至105日，每次產子3至4隻。幼崽獨立大約需要18個月的時間。

喺中國、朝鮮、印度等地，虎被視為嚴肅、勇猛嘅象徵。喺中國，老虎嘅形象喺商代嘅甲骨文就已經出現。老虎嘅別稱有大蟲、白額、斑子、李耳、大貓等，共有34種之多。中國傳統信仰，認為白虎係「天之四靈」之一，係代表西方嘅神獸。喺中國文化入面，虎經常龍相配，又被視為戰爭嘅象徵，例如調兵嘅信物就係以虎嘅形象出現，即「虎符」，衙門前立嘅木牌雕有虎頭，稱為「虎頭牌」，清朝四品武官嘅補子亦係一隻老虎。孔子亦以「苛政猛於虎」形容統治者嘅暴政比老虎更可怕。

老虎亦經常出現喺文學作品之中，例如《水滸傳》武松就係以打虎英雄嘅形象出現。民間亦有戴虎頭帽、著虎頭鞋嘅習俗，祈求小朋友健康成長。中國人亦有「虎」姓（一讀貓），根據《風俗通義》嘅說法，虎姓係虎姓是上古八元之一伯虎嘅後人。韓國稱老虎為「山君」，喺韓國人嘅建國神話中亦都有老虎嘅角色，又形容朝鮮半島形狀係似一隻老虎。而喺印度教，老虎係難近母（雪山神女化身之一）嘅坐騎。