濠記之前同大家分享過泰國、馬來西亞、新加坡，以至越南等東南亞國家重開邊境嘅進展。可能大家會問：同屬東南亞嘅菲律賓而家又係乜嘢情況呢？

好消息係，菲律賓近期嘅疫情亦大大舒緩咗落嚟啦！雖然當地累積超過282萬宗病例，但至11月22日，當地七日平均日新增318宗，比今年九月初七日平均20713嘅高峰，減少咗98.5%！

菲律賓旅遊部星期五宣佈，跨部門工作組原則上已經同意讓來自綠色名單地區、已經完成接種疫苗嘅人士以非必要理由入境，有關指引正待最終批准，並預計會喺今個月底前推出。

但旅遊部長浦耶特（Bernadette Romulo-Puyat）同時強調，措施會以嚴格嘅防疫條件為基礎。屆時只有已經完成接種獲菲律賓食品及藥物管理局授權緊急使用嘅疫苗，或獲世界衛生組織認可疫苗嘅人士先可以入境當地。

目前被菲律賓列入綠色名單嘅國家同地區，即疫苗接種率高而感染率低嘅國家同地區共有44個，包括中國內地、香港同臺灣，但唔包括澳門。而除咗荷蘭同法羅群島被列為紅色地區外，其他國家同地區都被列為黃色地區，當局已經提交與相關國家同地區建立「疫苗旅遊走廊」嘅計畫供工作組批准。