秋風起，除咗食臘味，浸住溫泉，欣賞湖光山色，都係一種賞心樂事。唔少溫泉仲有藥用價值。不過浸溫泉都有好多事要注意。萬一衛生措施無做好，隨時染病上身！

《醫學病例報告雜誌》（Journal of Medical Case Reports）九月份發表咗一篇論文，指一名十一歲奧地利女童喺義大利南部、西西里島同非洲大陸之間嘅潘泰萊里亞（Pantelleria），島上著名嘅「維納斯之鏡」（Specchio di Venere）溫泉浸完，就染上淋病。

淋病係一種可以感染生殖器官、直腸同喉部嘅疾病，一般經由性接觸傳播。不過奧地利同紐西蘭嘅研究隊伍，對女童嘅陰道採樣結果呈陽性，而佢屋企人嘅採樣全部都呈陰性。女童否認有任何性接觸，亦排除咗性接觸嘅機會，結論係女童係經由受淋球菌污染嘅溫泉，經過兩日潛伏期而感染淋病。

專家指出，溫泉與人體體溫接近、具有等滲透、弱酸性嘅特質，並且含有有機物粒子，都係有利淋球菌生長嘅條件。而且歷史上亦曾經有兒童透過沐浴而感染淋病嘅案例。

女童喺接受藥物治療，以及乳清浸浴兩周後，第四周檢測結果已回復陰性。

（Fox News）

溫泉浴須知

• 入浴前應徹底淋浴洗淨及卸妝，入溫泉池後不可搓揉身體。
• 應自備毛巾等貼身沐浴用品。
• 患有傳染性疾病者以及女性生理期間禁止入浴。禁止攜帶寵物入浴。
• 孕婦、行動不便老人及未滿三歲之幼兒，不宜入浴。酒醉、空腹及飽食後，不宜入浴。
• 患有心臟病、肺病、高血壓、糖尿病及其他循環系統障礙等慢性疾病者，應依照醫師指示入浴。
• 乾性及過敏性皮膚，應避免泡溫泉。
• 浸泡溫泉時間一次不宜超過十五分鐘，浸泡高度不宜超過心臟。
• 泡完溫泉後不宜直接進入烤箱，以免造成眼角膜傷害。
• 年歲較高、健康欠佳者，應避免獨自一人入浴，以免發生意外。
• 長途跋涉、疲勞過度或劇烈運動後，宜稍作休息再入浴，以免引發腦部貧血或休克現象。
• 泡浴中若有任何不適，請立即離池並通知服務人員。

另外，不同性質嘅溫泉亦有各自嘅禁忌症，入浴前亦應該了解溫泉區泉水嘅性質。

（日本環境省、臺灣疾病管制署）