2021年即將成為過去，新嘅一年仲有唔夠兩個月就會來到。

澳門文化局局長穆欣欣尋日表示，現階段無條件舉辦今年除夕倒數跨年晚會，主因係受疫情影響，較難落實外地表演團隊來澳，但佢強調，當局直至年底將舉辦一系列活動，包括澳門樂團新年音樂會、Hush音樂會，本月中亦會舉行中葡文化藝術節及中葡影展等，希望喺疫後恢復活躍城市氛圍。

而喺香港，旅遊發展局將於12月31日晚，首次舉辦跨年倒數演唱會，會喺西九龍文化區藝術公園舉行，現場可容納3000名觀眾，屆時會有歌手、男子團體及香港管弦樂團等表演，同時會喺網上直播，預料耗資約1700萬元。初步公佈表演嘉賓包括香港當紅組合Mirror、江海迦（AGA）、許廷鏗、李幸倪（Gin Lee），伙拍香港管弦樂團等。

呢次亦係旅發局自2018年以來，相隔兩年再次舉辦倒數活動。

演唱會門票將透過抽獎送出，名額1500個，中獎者可獲發兩張門票。演唱會將採取實名制，登記抽獎時要提供登記人及同行者嘅真實姓名、身份證號碼等資料。

為配合防疫要求，入場時要使用「安心出行」，戴口罩，年滿18歲的登記人士或同行者需要完成接種兩劑新型肺炎疫苗，12至17歲則最少已打一針，但如果12月13日或以前滿18歲，就要打齊兩針。

（香港電台／澳門電台）