大家覺得炎炎夏日，最好嘅伴侶係乜嘢呢？有咩好得過舔住冰涼嘅雪糕，又甜蜜又消暑呢？

濠記之前報道過新加坡已經單方面放寬對來自澳門同香港人士嘅入境限制。雖然現階段返回港澳仍然需要隔離，去當地旅行似乎唔係好實際。但新加坡最近都有新玩意，值得大家期待吓！

全球第三家、亦都係全亞洲第一家嘅雪糕博物館（Museum of Ice Cream Singapore），上星期五開幕啦！

新加坡分館耗時三年籌備，館內設有十四個互動式的裝置，其中包括著名嘅Sprinkle Pool，模仿兒童遊樂場嘅波波池，而概念就係源於雪糕上面嘅彩色朱古力米。不過喺池入面玩還玩，千祈唔好試圖當泳池咁樣跳入去，打吓咭咁就冇問題嘅！

博物館亦融合咗新加坡本地元素，例如係超大版Potong Ice Cream（即係星馬版雪條）、大巴窑龍形遊樂場等。博物館供遊人品嚐嘅雪糕種類亦包括黑糯米布甸（pulut hitam）同荔枝玫瑰水（lychee bandung）兩種本地口味，仲有純素同無奶口味供大家選擇。博物館目前打算每三個月轉換雪糕口味。其中一間試食室仲可以收聽到荷里活明星同你留言㖭！

入場參觀，記得帶埋你對雪糕嘅一份愛、身份證明文件同埋口罩喎！

新加坡雪糕博物館（ Museum of Ice Cream Singapore ）
地址：100 LOEWEN ROAD Singapore
開館時間：星期四至日上午十點至晚上十一點
門票：單人票42新加坡元，兩歲及以下免費入場（須預先購票）
網址：https://www.museumoficecream.com/singapore