各位仔仔女女，今日係一年一度嘅父親節！除咗飲茶食飯之外，濠記帶來兩個本地周日好去處，分別適合鍾意文藝同科技嘅爸爸！

• 

• 

• 

• 

近年澳門吹起一陣文藝風，就連舊城區都因此換上新面貌。其中位於司打口嘅新新酒店，前年已經改名叫藝舍酒店，外牆專門邀請多位新銳藝術合作髹上咗塗鴉圖案，可謂先聲奪人。

澳門文藝界每年嘅重點活動之一——塔石藝墟，每年春秋各舉辦一次。想舒服咁喺兩次藝墟之間購買本地文創產品？近期酒店亦有同本地創作人合作，喺酒店大堂開設周末迷你市集。而今個周末嘅市集，有手作飾物、以及外國品牌飾物出售。如果想同爸爸飲返杯，藝舍仲有來自雲南香格里拉嘅手工精釀啤酒。具有藏族特色嘅啤酒，六種口味試齊，都只係MOP238（單枝MOP45起）。

如果爸爸身兼標準球迷，歐洲國家杯應該可以慰藉其「餓波」年半之苦啦！新改名嘅澳比灣酒吧亦都推出多款套餐，啤酒連小食都係MOP58起！

話得明叫藝舍，外牆、活動已經咁文藝，室內設計裝修更加唔駛講！但要欣賞呢啲細節，最好梗係住返一晚啦！藝舍參加咗今年「澳人食住遊」計畫，住客仲可以參加酒店安排嘅藝術導賞團，由專業解說員帶領欣賞各樓層藝術創作，了解作者嘅故事同創作理念𠻹！

澳門藝舍

地址：司打口14-16號

電話：2893 9393

網址：https://www.macaohotel-s.com/

（迷你市集：1300 – 1900；啤酒特別場：1500 – 2200；澳比灣酒吧營業時間：1600-0000）

• 

• 

• 

• 

如果你爸爸係科技迷嘅話，目前正喺南灣湖畔立法會旁邊中葡綜合體舉行嘅「築夢『榮光』——見證百年中國鐵路發展主題展覽」就啱曬啦！

展覽分為四部分，分別介紹新中國成立前、新中國成立後至1978年、改革開放至2012年，以及2012年至今中國鐵路在各時期的發展。展覽除咗有圖片介紹中國鐵路喺路網、技術、服務以及對外交流嘅情況外，仲有三十多件實物模式，當中包括咗興建地鐵管道、鐵路隧道不可或缺嘅盾構機，以及復興號車體模型外，仲有按中國首條智能高鐵——京張高鐵實況製作嘅模擬器，「駕駛室」設備同真嘅幾乎一模一樣！有興趣嘅大小朋友仲可以一嚐揸火車，喺雨雪環境下高速奔馳嘅感覺！

築夢「榮光」——見證百年中國鐵路發展主題展覽

地點：中國與葡語國家商貿合作服務平台綜合體宴會廳（南灣湖湖畔前地）

開放時間：1030 -1800

展期至7月 10日