各位生活喺澳洲部份地區同紐西蘭嘅朋友，今晚臨瞓準備慶祝復活節之前，記得將時間撥慢一個鐘啦！

事關澳紐地區嘅夏令時間聽日（四月第一個星期日，今年落喺4月4日）凌晨三點就會結束，行返標準時間。到時會變成4月4日凌晨兩點正。

相關地區包括澳洲嘅新南威爾士州、維多利亞州、塔斯馬尼亞州、首都特區（以上都係由UTC+11＞UTC+10，即係由比澳門快三個鐘變為快兩個鐘，如此類推）以及南澳洲州（UTC+10.5＞UTC+9.5），仲有紐西蘭全國（UTC+13＞UTC+12）。不過靠近赤道嘅昆士蘭、西澳洲州同北領地唔採用夏令時，所以唔需要改時間。

澳紐下次改返夏令時間將會喺十月第一個星期日，即10月3日。而澳門曾經喺1961至1980年間實行過夏令時間。

（SBS）