大家一聽到沙漠，會諗到乜嘢？黃沙萬里？炎熱嘅天氣？駱駝商隊？

不過喺非洲，號稱世上最大嘅沙漠撒哈拉沙漠，最近就出現黃沙白雪同場嘅奇景！喺阿爾及利亞西北部嘅艾因塞夫拉（Aïn Séfra），上星期三錄得攝氏零下3度嘅低溫，沙丘上亦鋪上一層白雪，有人拍到人喺被冰覆蓋嘅沙丘上走過，留低黃色嘅腳印。

而喺中東嘅沙特阿拉伯，鄰近約旦嘅塔布克（Tabuk）地區亦錄得攝氏零下2度嘅低溫，有人拍到雪後駱駝嘅景象。當地喺夏天最高氣溫可以高達攝氏50度，而冬天平均氣溫係攝氏20.2度。就算係位於高山嘅塔布克地區，冬天平均氣溫係攝氏4度。

當地上一次出現落雪嘅情形要追溯到2018年。

而喺黎巴嫩、敘利亞同伊朗亦都有落雪，部份地區積雪更多達4英呎深。

有氣象分析員指沙漠落雪並不常見，不過唔係稀奇嘅事。另外有研究員透過分析撒哈拉地區雨量嘅變化，發現過去一個世紀由於氣候變化，沙漠面積明顯擴大。

（紐約郵報）