文化局早前宣佈取消今年除夕嘅倒數活動，以及煙花表演。今年為世界而言係充滿挑戰嘅一年。大家點樣揮別過去，迎接新嘅一年呢？

喺澳洲雪梨，雖然疫情已經有所緩和，但雪梨所在嘅新威爾斯州州長早前已經宣佈，除夕煙花匯演將縮短至7分鐘。當局將特別為當日制訂公共衛生命令，喺市中心設立「禁區」。喺環形碼頭（Circular Quay）同北雪梨（North Sydney一帶），只准餐飲酒店業嘅顧客或員工、當地居民同埋其訪客進入，而且必須攜帶透過Service NSW手機程式申請嘅「除夕通行證」（New Year’s Eve Pass）。至於雪梨歌劇院等地，更會封鎖預留畀前線工人觀看煙花。

喺全球疫情最嚴重嘅美國，紐約市時代廣場嘅倒數將會改喺網上進行。呢個將會係活動1907年第一次舉辦以來第一次唔會開放民眾參加。活動將會向醫護人員等致敬。

喺日本東京，傳統上喺1月2日，日皇會喺皇居接見民眾，接受祝賀。今年就有68700多人參加。不過明年嘅接見活動預計將會取消。活動上一次取消係1990年、日皇裕仁（昭和）去世後。

至於喺德國，總理默克爾尋日喺國會表示，明確支持德國國家科學院利奧波第那科學院（Deutsche Akademie der Naturforscher Leopoldina）星期二發布嘅建議，當中學校由12月14日開始放寒假，12月24日開始，非必要企業將全部關門至1月10日。