難得有人會關注呢個問題。

#沃門方丈 同埋 #沃門生態沙漠掙扎日記 都已經好仔細解釋咗問題所在。濠仔想回應兩點問題。

可能有讀者會問濠仔：你之前去影向日葵出嚟開POST。向日葵夠唔係本土物種，點解你會大細超？澳門不嬲都係物種交流嘅樞紐，引進呢個品種又咩出奇？

向日葵雖然來自南美洲，但散播種子嘅方法同草唔同，傷害性有限。而且向日葵生長亦唔會對其他生物有大影響，例如唔會遮蔽陽光、纏繞宿主或者吸收大量養份，好似微甘菊咁。從功能而論，向日葵係具經濟價值嘅植物，種植嘅地方一般喺農地，已經唔係原生態地區。

今次事件中，作為決策者，為市民喺難以出國嘅非常時期提供一啲「打卡位」固然係善政，但佢哋同時又係具有專業知識嘅一群，喺決定作出引進時，又有冇諗過自己嘅決定會做成咩不可挽回嘅影響？佢哋應該有呢方面嘅敏感度。慶幸澳門資訊尚算透明，多年來喺教育方面嘅投入讓澳門市民知識水平提高咗，市民對各種議題越來越有能力表達意見，值得高興。

希望當局日後做同類活動時候應該優先考慮本地物種，並教育市民保護本地生態系統嘅重要性。作為市民喺參加類似活動前，亦應該做吓功課，睇吓會唔會對生態做成影響，唔好淨係為滿足自我做咗壞事都唔知！畢竟澳門嘅生態系統，係屬於澳門人，同埋生活喺呢度嘅生物。澳門人唔珍惜，就無人會為你珍惜啦！