喺每年十月全球矚目嘅諾貝爾獎公佈得獎名單之前，都有一個「搞笑諾貝爾獎」。

今年嘅得獎名單喺上星期亦已經公佈。受新型肺炎疫情影響，呢項有三十年歷史嘅獎項，今年都只能網上直播。

今年印度連奪兩獎。第一個獎係和平獎，由印度同巴基斯坦兩國政府平分。評審團解釋獲獎嘅理由係：兩國外交官深夜靜靜雞㩒對方門鐘，然後喺對方應門前就消失得無影無蹤。

而呢篇報道嘅配圖亦都係濠仔特別挑選嘅。由於宗教分歧，印巴兩國自1947年從英國獨立，馬上就展開血腥仇殺同迫遷。之後再因為克什米爾歸屬問題爆發邊境衝突，兩國更競相研發核武。不過喺印度同巴基斯坦邊境，位於巴基斯坦第二大城市拉合爾同錫克教聖城教阿姆利則之間嘅瓦加（Wagah），每日黃昏印巴兩軍都喺互相叫陣同步操比拚中，降下各自國旗然後關閉邊境通道，更成為一處觀光景點。

而印度今年第二個獎項係嚟自「醫學教育獎」，由該國總理莫迪，以及美國總統特朗普、英國首相約翰遜、巴西總統博爾索納羅等多國政客共同奪得，以「表揚」佢哋利用新型肺炎疫情，教導世人政客比醫生和科學家對人嘅生死有更即時嘅影響。