身為澳門人，都應該知道澳門位於中國南方沿海。

不過最近有網民同版主分享佢遇到嘅一張圖，係屬於某社團嘅會徽，當中澳門被標到應該係美國佛羅里達州嘅位置。有朋友就表示羨慕，又有人笑話佛羅里達州係「大澳門帝國海外殖民地」。

其實即使我哋由澳門向下，假設可以挖到地球另一端，都唔會到達佛羅里達。呢個點喺地理學上稱為對蹠點（antipode）。

其實要計出一個地方嘅對蹠點好簡單。澳門地坐標係北緯22°11’47″、東經113°32’58″。然後將佢轉換成南緯22°11’47″、西經68°27’02″（180減去113°32’58″），就係澳門嘅對蹠點啦。

據此結果，澳門嘅對蹠點係位於阿根廷西北部胡胡伊省聖卡塔里娜縣、接近玻利維亞邊界。以北緯22°11’47″、西經113°32’58″計算，座標係位於墨西哥西南嘅太平洋海面。如果用北緯22°11’47、西經68°27’02″計算，坐標會落喺波多黎各以北、英國屬地特克斯和凱科斯群島以東嘅大西洋海面，但都唔會係佛羅里達。

而由於海洋佔地球表面面積七成，所以「陸地的另一端是陸地」情況並唔常見，而有人居住嘅地方更係少之又少，例如香港嘅對蹠點係胡胡伊省首府聖薩爾瓦多-德胡胡伊。