喺疫情下，市民留喺澳門活動，假日期間多咗市民享受大自然。而近來去路氹城保護區、大炮台、松山，有不少觀鳥人士，帶埋「長短火」拍攝雀鳥生態。

原來根據市政署2018年的調查，澳門有126種雀鳥，分屬12目41科，其中留鳥57種，佔總鳥種45%；遷徙鳥包括：冬候鳥、夏候鳥和遷徙過境鳥69種。

本澳優勢種是白頭鵯，共記錄3050隻，另外小白鷺5302隻；常見種有10種，其中珠頸斑鳩、八哥、長尾縫葉鶯、暗綠繡眼及麻雀等五種屬於林鳥，蒼鷺、大白鷺、池鷺、夜鷺及綠翅鴨等五種屬於水鳥。

另外，2018年本澳也新記錄了兩個鳥種，分別是烏鵑及鳳頭潛鴨。另外，中國二級保護鳥類有八種，包括岩鷺、黑臉琵鷺、黑鳶、松雀鷹、普通鵟、白腹海雕、鳳頭鷹及褐翅鴉鵑。

至於分佈方面，松山、紀念孫中山市政公園、大潭山環山徑、小潭山2000環山徑、黑沙水庫家樂徑、東北步行徑系統、九澳水庫環湖徑、龍環葡韻濕地、路氹城生態一區和二區都錄得超過30種鳥類。

各位朋友，趁復活節假期，不妨出外欣賞各種鳥類，認識澳門豐富的生態啦！不過要記得保持社交距離同地方清潔，同埋要安靜、唔好騷擾雀仔呀！

（圖片攝於2019年，下紅圈為黑臉琵鷺）