疫情之下，各位朋友大家都多咗出街食飯，多咗食住家飯。但係如果係家中男士買餸，又有冇被考起呢？

英國廣播公司報道，最近馬來西亞實施行動管制令，即類似居家令，當中規定只能容許「一家之主」外出購物，但邊個先係一家之主就無明確規定，結果喺超市就有好多男士手上揸住shopping list，一面迷惘咁樣，好多仲唔識分各種蔬菜、香草同香料。

有女士喺社交媒體話：「政府叫男士一個人買嘢？簡直係災難！」

又有男士話購物好似尋寶，個個都要重複核對幾次。

又有人話：「購物恐懼症嘅真正意義係：男人要以一家之主身分一個人去買嘢。更恐怖嘅係，佢以前都唔需要識得薑、高良薑、唐芹、蔥同韭菜之間嘅分別。」

「當我要分邊隻係芥菜、菠菜同白菜我就頭都暈。椰菜又分長嘅、圓嘅、短嘅。」

有人話屋企叫佢買紫洋蔥，佢先發現原來有好多種：「玫瑰洋蔥（Rose onions）、大洋蔥、印度大洋蔥、印度小洋蔥、緬甸洋蔥、泰國洋蔥、印尼洋蔥。」

又有人問：「邊隻係西芹？」「隻隻都一樣。」結果就有2萬人like啦。

又有男士話平時對買嘢好有信心，直到見到原來有女士衛生棉條有咁多種。

有位女士話平時都係佢負責買嘢，細佬就幫手。由於呢個禮拜佢要留喺屋企，於是就叫佢細佬去買啦。購物清單上有「綠豆」（green beans），係下午茶煲糖水用嘅。

但結果佢買咗豆角（long beans）返嚟，搞到家姐標住眼水，又笑到出唔到聲。

細佬就話家姐之前有逐樣教過佢，不過一到超市：「我就唔好意思拎張紙出嚟……我見到另外幾個男人都係好辛苦喺度睇住張清單搵緊嘢。」佢淨係記得要買豆啫。

細佬就話以後買嘢都係交返畀家姐啦。

仲有，平時買嘢不過半個鐘，佢買嘢就用咗成個半鐘先返。「佢就係咁問我點解咁遲先返。」

另一個男士本來要去買一塊高良薑，結果買咗成1公斤返去。「老婆想殺死人嘅眼神真係無法忘記。」有人就教路叫佢種落剩低嘅高良薑，以後就唔駛煩啦。

當地有州政府同超市合作出懶人包教大家認識各種蔬果以及雞隻嘅部位，又有廚師拍片教大家揀魚。又有人出帖教男士出街之前要叉好手機，有事都可以問太太，但唔好開揚聲器喎！「有個男士就係開住揚聲器，畀老婆大聲鬧：你買錯甘筍啦！」