英國雖然已經喺上個月31日正式脫歐，不過仲有好多問題，要喺唔夠11個月嘅過渡期內解決。

其中一個係時區問題。

目前英國同愛爾蘭都係屬於GMT+-0時區（歐洲西部時區，比澳門快八個鐘）。夏天實行歐洲西部夏令時間（GMT+1，比澳門快七個鐘）。

喺脫歐協議當中規定屬英國嘅北愛爾蘭喺貿易、農業等方面要跟隨歐盟規定，避免喺愛爾蘭島上有硬邊界。

而歐盟舊年已經決定未來全年實施夏令時，即係北愛爾蘭亦要全年撥快一個鐘（GMT+1）。但結果英國就會變成有兩個時區，而且位於西面嘅北愛爾蘭一年有大約一半時間比不列顛仲要快一個鐘。