中美貿易戰，隨住上星期簽署首階段協議暫時緩和落嚟。日元亦跌至舊年8月26日以來嘅新低，係日本旅行好時機！不過今年亦會有好多新規矩生效。大家就要注意啦！

強制性膠袋徵費
為改善塑膠污染嘅狀況，膠袋徵費已經係世界趨勢。日本亦都會喺七月實施新指引，索取膠袋必須徵收不少於一日元（折合0.07澳門元）。盛載易變質食物嘅膠袋以及以植物製成嘅環保膠袋可獲豁免。

機場安檢要除鞋
呢個新規定其實已經喺舊年9月13日實施啦！除咗平時安檢要除外套同拎出褲袋內面嘅物件外，高過腳眼嘅鞋都要除低安檢！乘客亦會有機會接受貼身搜身以及用棉棒抹手。所以喺日本乘坐飛機就要提早報到啦。

新住宿稅
除咗舊年十月嘅消費稅上調外，喺東京、大阪、京都金澤同埋北海道俱知安町住酒店都會收稅。喺東京，每晚房價超過一萬日元（727澳門元）嘅房間就需交稅。15000日元以下嘅房間收100日元（7.27澳門元），15000元或以上就收200日元（14.5澳門元）。大阪、京都、金澤都係按每人每晚徵收，而俱知安町稅率係房費2%。不過，東京將會喺7月1日至9月30日期間暫停徵收稅項。

至於九州福岡縣4月起更會收取雙重酒店稅，即縣一份、酒店所在嘅市一份。縣稅劃一50日元、市稅按當地情況而定，福岡市就係兩級制：房價兩萬日圓以下收150日圓，以上收450日圓。

羽田機場客運大樓改名
俗稱羽田機場嘅東京國際機場目前由兩座國內線大樓同埋一座國際線大樓組成。但為咗迎接夏季奧運會，三月起第二國內線大樓都會開放國際航班升降，國際線大樓將會改名為第三客運大樓。以後搭車去羽田就要記得啦！

帶大件行李坐新幹線要訂位
攜帶長闊高總和為161至250公分之間（251公分以上不可攜帶）嘅大件行李乘坐東海道（東京—新大阪）、山陽（新大阪—博多）和九州（博多—鹿兒島中央）三條新幹線列車嘅朋友，五月起就要事先預訂特別坐位，或者入閘前更改座位，否則就要加收1000日元（727澳門元）嘅費用。

公眾假期變動
今年係新天皇即位第二年、即令和二年。天皇生日亦會由平成年間嘅12月23日改為2月23日慶祝。另外由於今年適逢東京舉行夏季奧運會（7月24日—8月9日）同殘奧會（8月25日—9月6日），海之日同運動之日將會分別調到7月23、24日放假，而山之日亦會調到8月10日放假。