澳門藝術博物館開館二十年來，一直都同故宮博物院有合作關係。每年故宮博物院都會借出展品，畀澳門市民同遊客近距離欣賞故宮藏品。

今年由文化局、故宮博物院、藝博館合辦嘅主題展覽，題目係「星槎萬里——紫禁城與海上絲綢之路」，展出故宮與海上絲綢之路有關嘅一百五十件文物。

展品除咗有明清宮廷自己生產嘅物品外，唔少係包括日本、歐洲等地進貢嘅物品。其中版主覺得最值得欣賞嘅展品係當中嘅科學教具。除咗做工精緻外，呢啲教具亦見證中西文化史上嘅一段佳話。清朝初期順治、康熙兩位皇帝都曾經求學於居於宮廷嘅耶穌會傳教士，師徒之間建立深厚嘅友誼。

另外展品中一部極具意義嘅展品係《皇清職貢圖》。從畫卷中我哋可以了解到，十八世紀嘅時候，中國同邊啲國家有往來，同埋中國人對異邦人嘅觀感。而好重要嘅係，呢部文獻不但抄錄咗歷史上第一部系統介紹澳門嘅著作——《澳門紀略》嘅內容，更印證咗澳門喺當地全球交往中嘅地位。

展期：2020年1月11日至2020年4月13日
時間：上午10時至晚上7時（下午6時30分停止入場，週一休息）
地點：澳門藝術博物館四樓
票價：免費入場
網頁：www.mam.gov.mo
查詢電話：(853) 8791 9814

註：槎，國音chá，粵音caa4，同「茶」，本義是「木筏」咁解。