聖誕假期就快到，好多人都會準備去旅行。而位於南半球嘅澳洲，時值夏天，更係學校暑假，加上澳洲幅員廣大，航空交通非常重要。

不過，澳洲廉價航空公司捷星航空（Jetstar Airways）最近就麻煩多多。星期二由於電腦故障，導致三十多班澳洲國內及澳紐航線取消。公司承諾會退款或免費更改機票。

另外，捷星行李處理員及地勤星期五早上五點半起將在悉尼、墨爾本、布里斯本、開恩斯同阿德雷德罷工兩小時。

星期六，澳洲機師聯會將會喺兩日內分別進行三次、每次四小時嘅罷工。罷工預計將持續至下周，但聯會承諾唔會影響聖誕新年當周嘅航班。

捷星承諾如果航班取消或延誤超過三小時，乘客可以獲退款或轉乘其他航班。至於被迫滯留過夜嘅乘客，航空公司亦會安排住宿及餐食。航空公司表示，原訂12月14至20日出發而打算取消嘅乘客可以透過實時聊天功能申請退款。乘客亦可選擇提前喺12月13日或之前出發，只需聯絡航空公司即可。

而捷星亞洲、捷星日本、捷星太平洋都唔受罷工影響。

今次機師同地勤罷工原因都係為爭取加薪，其中地勤更受到就業不足困擾。而資方就聲稱機師要求15%加薪會對機票價格構成壓力，但機師聯會否認，表示只要求3%加幅，15%加幅係基於對非薪酬項目嘅不準確同埋有瑕疵嘅成本估算。地勤方面要求加薪4%，但航空公司堅持最多加3%，並聲稱已經高於全國私營企業平均值。

（7news.com.au）