港澳旅客進出德國，通常都係用法蘭克福或慕尼黑機場，咁點解冇直航機去首都柏林呢？

原來柏林有三個國際機場——泰格爾（Tegel）、滕珀爾霍夫（Tempelhof）以及服務東柏林嘅舍訥費爾德機場（Schönefeld）。冷靜結束，加上三個機場老化，柏林需要一個新機場。於是喺舍訥費爾德機場以南興建柏林勃蘭登堡機場（Flughafen Berlin Brandenburg, FBB），希望可以取代三個舊機場。

不過經過貪腐、設計差劣等醜聞，新機場由2006年宣佈將喺2011年啟用，至今經歷多達十次延期，星期五又宣佈新嘅啟用日期——2020年10月31日。屆時將會係原訂啟用日期後嘅九年零一日。造價亦由原來28.3億歐元增至超過70億歐元。

由於大幅延期，未來新機場啟用後，泰格爾同舍訥費爾德機場將會繼續運作，以應付客流。接駁交通方面，屆時將有RE-9鐵路同柏林中央車站連接，需時30分鐘。