尋日介紹過阿根廷🇦🇷首都布宜諾斯艾利斯。咁阿根廷係咪淨係得首都好玩呢？

當然唔只啦！阿根廷係世界面積第八大國家，國境景觀多變化。最好玩嘅當然要出郊外啦！

只要開車離開首都，周圍都係一望無際嘅潘巴斯（Pampas）草原，係阿根廷土壤最肥沃、農業最發達嘅地區。呢度生活住「學騎馬早過學行路」嘅高卓人（Gauchos）。記得欣賞佢哋嘅馬術表演，然後享用埋阿根廷國菜——烤肉（Asado）、呷一口馬黛茶（maté）先再去下一個地點啦！

世界新七大奇景之一嘅伊瓜蘇瀑布（Iguazu Falls）位於阿根廷東北部。同尼亞加拉瀑布一樣，呢個瀑布都係跨國瀑布，係由阿根廷同巴西共同管理嘅：阿根廷喺瀑布右邊，佔80%。其實瀑布亦比較正對阿根廷方面，不過巴西都好聰明，修咗一條棧道，等由巴西出發嘅朋友睇多啲。去到不妨留意吓！路上仲可以參觀耶穌會喺當地向瓜拉尼人傳教點嘅遺址。

不過，所謂寶物尋歸底，阿根廷最好嘅風景都係需要啲時間先去到嘅。阿根廷南部係荒涼嘅巴塔哥尼亞高原（Patagonia）。呢度雖然寒冷、乾燥，人煙稀少，但呢度同時擁有冰川、荒漠同海洋，以及世界最南方嘅森林，以及包括美洲獅、美洲駝鳥、南方露脊鯨、海獅等野生動物。

講到天涯海角，世界上有好多地方都可以咁樣稱呼。不過阿根廷最南面嘅烏斯懷亞（Ushuaia）可以話係世上最南、較有規模嘅城市啦，有唔少遊輪停靠呢度。呢度亦有去南極洲嘅行程。
*****
如何前往阿根廷？

澳門未有直航機前往阿根廷。
從香港出發，亦需要至少轉一次機。
個人推薦皇家荷蘭航空（KLM）來回香港及布宜諾斯艾利斯HKD16,768，唔算最平，但平均需時比較好，單程都係30個鐘。中途只停阿姆斯特丹一站，方便又唔怕要申請過境簽證，方便之選！