尋日澳門🇲🇴同阿根廷🇦🇷正式簽署互免簽證協議，下個月13號起生效。屆時澳門特區護照持有人可以喺阿根廷免簽證逗留30日。

咁呢個「南美二哥」有啲咩好玩呢？

阿根廷位於南美洲東南部，呈倒三角形，南端伸入南極海域，西面有安弟斯山脈同智利隔開。北面有森林，東部有大草原。地理環境十分多元化。喺文化方面，阿根廷亦融合咗原住民族、西班牙、義大利同威爾斯等地移民嘅文化。天主教現任教宗方濟各就係義裔阿根廷人！

阿根廷首都係布宜諾斯艾利斯（Buenos Aires），位於拉布拉塔河口西岸，人口1560萬，係美洲第四大都會，亦係南半球最早有地鐵嘅城市。市內除咗有主要政府建築物外，仲有好多特色社區，例如係球王馬勒當拿成長嘅小保加（La Boca）區。呢度文化生活亦相當豐富，例如被譽為「世上最美書店」嘅雅典人書店（El Ateneo Grand Splendid）就喺聖菲大道。布宜諾斯艾利斯更係探戈舞嘅誕生地。無論係劇場、俱樂部，或者喺室外，都可能有機會欣賞到男男女女大跳探戈！

講到阿根廷最出名嘅女性，相信就係貝隆夫人（Eva Perón）啦！連著名歌手麥當娜都曾經喺電影中飾演過佢，仲唱過一曲《Don’t Cry for Me, Argentina》！佢死後就安葬喺拉雷科萊塔公墓（Cementerio de la Recoleta）。