今日最震撼嘅國際新聞，可以話係全球第一家商業旅行社Thomas Cook，由於無法獲得資金維持營運，宣佈進入強制清盤狀態，正式結束其178年嘅歷史。

大眾旅遊不是新鮮事物，即使喺外出條件較原始嘅時代，朝聖、進香都可以吸引人們呼朋引伴遠遊，只要人有閒暇、有閒錢就可以參加。

不過當年Thomas Cook確實帶動咗商業旅遊嘅發展。當中模式係由旅行社扮演組織者嘅角色、透過工業革命發展嘅成果，例如日益發展嘅交通同通訊網絡，包括鐵路同電報，以及往來各國之間嘅金融制度，串連成一條完整產業鏈，甚至曾經擁有匯兌、航空等業務。

其實Thomas Cook自上世紀70年代重新市場化以來，已經轉手多次。1992年起兩度被德國企業收購，到2007年與MyTravel合併，而導致Thomas Cook結業嘅導火線係內地復星旅遊文化星期日（22日）拒絕提供2億英鎊，亦終止收購Thomas Cook嘅計劃。

如今旅遊業已經係全球經濟不可或缺嘅一部份。不過到咗互聯網世代，旅行社面對自助旅遊、旅遊網站等競爭，Thomas Cook嘅結局，可以話係「成也科技，敗也科技」。