東京日本橋以日本道路起點聞名，但到過嗰度嘅朋友，往往都會失望而回。因為喺揉合日本同西方特色嘅石橋上，一條架空天橋穿過，懸浮喺石橋之上。

呢個局面經歷多年，終於有改變嘅機會。根據《朝日新聞》報道，三井不動產喺上星期四（8月29日）宣佈，為配合首都高速公路地下化，對日本橋再開發，目標令日本橋重現江戶時代嘅水都風貌。

計劃範圍包括日本橋川兩岸全長大約600公尺、面積6.7公頃嘅區域，預計2025年左右動工、2030年代末至2040年代左右完工。據報工程費估計需要幾千億至一兆日圓。

三井不動產自2004年的「COREDO日本橋」開始，一直喺日本橋地區興建商業設施同辦公大樓。今次計畫嘅對象係地區嘅象徵日本橋以及其周邊，將成為再開發嘅核心區域。

針對被高樓大廈圍繞嘅河岸部份，將會鋪設散步道，並配置低樓層嘅餐飲店同埋商業設施。店面嘅入口將面對河川方向，使人可以來往自如。三井不動產社長菰田正信表示：「雖然計畫難度高而且費時，但絕對會將佢完成。」

圖一：日本橋現況（2019年8月）
圖二：工程完工效果圖（圖：三井不動產）