繼阿聯酋後，又一個中東大國——伊朗宣佈向澳門免簽證啦！

咁伊朗又有咩好玩呢？

古典文明：首先喺伊斯蘭教傳入伊朗之前，伊朗已經有好悠久嘅文明！古代第一個橫跨歐亞非三大洲嘅波斯帝國，就係今日伊朗嘅前身！波斯人以自己嘅文化為驕傲，更稱第三大城伊斯法罕係「半個天下」！即使係今日，伊朗仍然可以力抗伊拉克入侵同美國敵對！（邊度睇？德黑蘭前美國大使館、波斯波利斯、伊斯法罕伊瑪目廣場）

自然風光：咪以為中東就一定只係有沙漠！伊朗南面係波斯灣，北面係世界最大嘅湖泊裏海，雨量充足、農作物豐富。當地嘅森林今年先被列入世界自然遺產。首都德黑蘭市郊仲有高山，可以供人滑雪。

宗教文化：伊朗信奉嘅係什葉派伊斯蘭教，同其他信奉遜尼派伊斯蘭嘅國家有好大差別，例如係謁見聖人陵墓嘅習俗。但當地亦有其他不同信仰嘅人士生活，包括猶太人同埋基督徒。古代嘅「拜火教」祆教亦源自伊朗，至今仍然存在。（邊度睇？馬什哈德、設拉子粉紅清真寺、亞茲德）

購物天堂：伊朗係古絲綢之路嘅核心地帶，自古貿易繁盛，而且盛產珍貴香料同果仁，又有發達嘅手工業。加上近年伊朗受美國制裁、貨幣里亞爾幣值下跌，買多啲手信、支持當地經濟都係好事！（邊度買？德黑蘭大市集）