近年來全球興起「走塑運動」，普遍被認為係由一張鼻孔因插入膠飲管受傷流血嘅海龜而觸發嘅。

但海龜面對嘅生存威脅仲有好多，例如之前有提過產卵地被破壞就係好明顯嘅一種。

喺澳門，我哋由於人口密集，即使有海灘都係泳客去處，海龜唔會返嚟產卵。但喺我哋附近嘅珠江三角洲，惠州同香港都有海龜產卵地。

而香港唯一有海龜產卵嘅地方係南丫島嘅深灣。每年由6月1號開始都會封閉海灘至到10月31號。為咗保護呢一片產卵地、保障海龜嘅繁殖，希望大家唔好進入海灘同埋附近水域，唔好亂拋垃圾、扎營同進行水上活動，更加唔好騷擾海龜媽媽、海龜蛋同埋海龜BB。

須知海龜能夠平安長大再返嚟出世嘅地方繼續繁衍，過程就係充滿艱險。萬一佢哋唔再返去，咁海龜無法繁殖，好快呢種有一億五千萬年歷史嘅生物就會消失喺地球上！

香港漁農自然護理署
shorturl.at/gsOQ0