蒙古最西部嘅巴彥烏列蓋省最近爆發腺鼠疫。

據俄羅斯《西伯利亞時報》報道，有一對分別38同37歲嘅當地人夫婦獵殺並進食生嘅土撥鼠肉同內臟感染腺鼠疫。兩人已經死亡。

蒙古當局已經無限期對外封閉全省，目前有多達158名嚟自俄羅斯、美國、瑞士、瑞典、德國、韓國同荷蘭嘅旅客滯留當地。

腺鼠疫係一種由細菌引起嘅傳染病。普遍認為腺鼠疫係十四世紀導致歐洲三分一人口死亡嘅「黑死病」。根據世界衛生組織資料顯示，2010至2015年間，全球有3,248宗腺鼠疫案例，其中549人死亡。只要服用抗生素，腺鼠疫係可以治癒嘅。

（圖片來源： Getty Images/iStockphoto ）