擁有世上最大蜥蝪、有「龍之島」之稱嘅印尼科莫多島，明年一月起要關閉啦！

印尼《雅加達郵報》星期五（3月29日）報道，當地政府發言人當日宣佈，2020年1月起將對外關閉科莫多島。

封島嘅決定係源於東爪哇警方揭發，有人試圖將41隻科莫多巨蜥走私出境，每隻要價5億印尼盧比（折合284,363澳門元）。 

發言人表示，封島範圍只包括科莫多島，唔包括科莫多國家公園嘅其餘部分。發言人又表示，封島可以改善島上環境，確保巨蜥有足夠嘅食物，又可以集中精力幫助蜥蝪繁殖，增加佢哋嘅數量。政府又計劃喺島上廣植原生樹木，美化科島。

科莫多島前往方法：
先乘飛機到巴里島（登巴薩），再轉機到弗洛雷斯島嘅科莫多機場（位於拉布漢巴焦Labuan Bajo），然後乘渡輪前往

*****
版主：有人要走私科莫多龍，但你知道養科莫多龍有幾危險嗎？一來佢長大咗力大無窮，而且口水入面嘅細菌可以殺死一隻動物，係佢嘅「必殺技」！

野生動物係應該留喺佢哋本來嘅地方！

（圖片來源：Shutterstock / Kjersti Joergensen）