恭喜雅加達地鐵落成通車！

呢個人口有大約一千萬嘅印尼首都，直到前日仍然係東南亞冇地鐵系統嘅最大城市。希望地鐵嘅通車，可以減輕當地塞車嘅情況。

至於目前開通嘅南北線第一階段，長15.7公里，連接迎賓廣場（Monumen Selamat Datang）到Lebak Bulus，沿途主要係商業區。至於第二階段通往國家紀念碑（MONAS）同埋雅加達老城（Kota，即荷蘭殖民時期嘅巴塔維亞）、長7.8公里嘅路段，就預計要2024年通車啦。

而今年喺東南亞嘅另一個國家越南，兩個主要城市：首都河內同埋最大城市胡志明市都會開通地鐵。呢個以電單車為主要交通工具嘅國家，城市面貌可能會有好大改變。

（圖片來源：歐新社）